Blog

Լիլիթ Մարգարեանի Նորաձեւութեան Հաւաքածոյի Ցուցադրութիւն Ի Նպաստ՝ ՀՕՄի Ստեփանակաերտի Սօսէ Մանկապարտէզի Շինարարական Ծրագրի

«ՀՕՄը ճիշդ ժամանակին իրականացրեց մանկապարտէզի ծրագրերը», Յայտարարեց Արցախի Փոխ-Վարչապետ Զօրավար Արթիւր Աղաբէկեան

ՄԱՐՕ ՔԷՇԻՇԵԱՆ

Կիրակի, 12 Յունիս 2016ի երեկոյեան, աւելի քան վեց հարիւր հայորդիներ փութացած էին Եունիվըրսըլ Հիլթըն պանդոկի սրահը, ներկայ գտնուելու եւ ըմբոշխնելու հայրենի արուեստագէտ, հանրածանօթ ձեւաւորող Լիլիթ Մարգարեանի հրամցուցած Հայոց Ցեղասպանութեան 100ամեակին նուիրուած նորաձեւութեան հաւաքածոն։ Հաւաքածոյ մը, որ կը ներկայացնէր 20րդ դարու հայ կինը, իր ժամանակաշրջանի նկարիչներու ստեղծագործութիւններուն ընդմէջէն։ Մեծ թիւով հայորդիներ փութացած էին սրահ, նաեւ մասնակից դառնալու ազգանուէր այս ձեռնարկին, որուն հասոյթը պիտի տրամադրուի ՀՕՄի Ստեփանակերտի Սօսէ մանկապարտէզի շինարարական ծրագրին, որուն շինարարութիւնը արդէն իսկ յառաջացած ընթացքի մէջ է։

Ժամը 5-6-ի ընկերային հաճելի ժամէն ետք, ներկաները սրահ առաջնորդուեցան եւ հմայքով հետեւեցան հրամցուող ծրագրին։

Ներկաներ ողջունեց եւ երեկոն ձեռնհասօրէն վարեց ծանօթ հանդիսավար Արշալոյս Դարբինեանը, որ ողջունելէ ետք ներկաները, ներկայացուց օրուան պաշտօնական հիւրերը, որոնց կարգին էին Արցախի  հանրապետութեան փոխ-վարչապետ զօրավար Արթիւր Աղաբէկեան, ՀՀ Լոս Անճելըսի հիւպատոս Արմելա Շաքարեան, ՀՕՄի Կեդրոնական Վարչութեան անդամներ փոխ-ատենապետ Նայիրի Տէրտէրեան, Ռիթա Հինդլեան եւ Մարալ Մաթոսեան, Շրջանային Վարչութեան կազմ, Կլէնտէյլի քաղաքապետ Փոլա Տիվայն եւ քաղաքապետական Խորհուրդի անդամ Զարեհ Սինանեան, ՀՕՄի բարերարներ, նուիրատուներ, համակիրներ եւ բազմաթիւ ՀՕՄի անդամներ։

Ամերիկայի, Հայաստանի եւ ՀՕՄի քայլերգները մեներգեց պրն. Ռաֆֆի Քերպապեան։ Որմէ ետք, ՀՕՄի Կեդրոնական Վարչութեան պատգամն ու գործունէութիւնը ներկայացուց Մարալ Մաթոսեան, որ անդրադառնալով Արցախի սահմաններուն կատարուած ատրպեճանական ձախողած ներխուժումներուն, վեր առաւ Արցախցիի խիզախութիւնը եւ ներկայացուց հայրենի ժողովուրդին կարիքներուն հասնող ՀՕՄի ազգանուէր գործունէութիւնը։ Ապա, անդրադառնալով  վերջին Ապրիլեան կռիւներէն ետք,Արցախի կատարած օժանդակութիւնները, ընդհանուր հաշուետուութիւն մը կատարեց ՀՕՄի շրջաններու եւ անհատ նուիրատուներու կողմէ յատկացուած գումարներուն մասին, որոնց գումարը կը հասնի $135,471։

«Ապրիլեան քառօրեայ պատերազմը,  նոր մարտահրաւէրով անգամ մը եւս եկաւ յիշեցնելու, թէ այն աշխատանքը որ ցարդ տարուած է ինքնաբաւ դարձնելու սահմանամերձ շրջաններու բնակչութիւնը, կը մնայ առաջնահերթ կարիք: Առաջնահերթ է նաեւ դաստիարակել նոր եւ գալիք մատղաշ սերունդները, որոնք պիտի դառնան ապագայի մեր ղեկավարներն ու առաջնորդները, միաժամանակ աշխատանք հայթայթելով երիտասարդ ծնողներուն եւ նիւթապէս ապահովելով ընտանիքները՝ կառչած մնալու իրենց պապենական հողերուն: Այս հեռանկարով էր, որ Հայ Օգնութեան Միութիւնը ծրագրեց եւ իրականացուց «Սօսէ» Մանկապարտէզներու ծրագիրը՝ Արցախի տարածքին», ըսաւ ընկերուհին։

Իսկ կեդրոնանալով  ՀՕՄի Ստեփանակերտի Սօսէ մանկապարտէզի շէնքի վերակառուցման ծրագրին, յայտարարեց, թէ ցարդ հանգանակուած է $428,000, որուն $150,000ը տրամադրուած է ՀՕՄի Արեւմտեան շրջանէն,  կան նաեւ աւելի քան $200,000-ի խոստումներ: Անգամ մը եւս յիշեցնելով որ ազգանպաստ աշխատանքը կը շարունակուի, Մաթոսեան շնորհակալութիւն յայտնեց շրջանի ՀՕՄի Շրջանային Վարչութեան եւ 26 մասնաճիւղերու անդամներուն, որոնք սատար կը հանդիսանան Կեդրոնական Վարչութեան աշխարհատարած բոլոր ծրագիրներուն։

Ձեռնարկի կազմակերպիչ ՀՕՄի Ստեփանակերտի Սօսէ մանկապարտէզի շինարարական ծրագրի յանձնախումբի անունով ելոյթ ունեցաւ Սեդա Խոճայեան։ Ան շնորհակալութիւն յայտնեց ներկաներուն, օրուան մարդասիրական ծրագրի զօրակցութեան համար, որ մեծապէս պիտի նպաստէ ապահով երթիք մը ապահովելու Արցախի պաշտպանութեան հերոսներու երեխաներուն, որոնք իրենց հայրենիքի ապագան են։ Ընկերուհին մեծ գոհունակութեամբ նաեւ փոխանցեց, թէ Հայրենիքի եւ Սփիւռքի մէջ գործող ՀՕՄի բոլոր միաւորները, իրենց ամբողջական ներդրումը կը բերեն յաջողեցնելու ՀՕՄի Ստեփանակերտի Սօսէ Մանկապարտէզ վերաշինութեան ծրագիրը։

Ապա, տեղի ունեցաւ այնքան սպասուած հանրածանօթ ձեւաւորող Լիլիթ Մարգարեանի «Gallery 100» հաւաքածոյի նորաձեւութեան ցուցադրութիւնը, որ նպատակ ունէր ներկայացնելու հայ կնոջ ուժեղ կերպարը։ Կին, որ գոյատեւած է եւ կը շարունակէ գոյատեւել, շնորհիւ իր հզօր կամքին ու հաւատքին։ Հայ կին, որուն գովքը հիւսած են են արուեստի բոլոր մեր մեծերը, յատկապէս գեղանկարիչները։ Յովնաթանեանի կտաւներուն մէջ ան ներկայացուած է իբրեւ բարձրաճաշակ ու նրբագեղ։ Գէորգ Գրիգորեանի, Ջիոտտոյի նկարներուն մէջ՝ անկոտրում ու միշտ պայքարող։ Արշիլ Կորքիի, Վահրամ Գայֆէճեանի, Վարդգէս Սուրէնեանցի ստեղծագործութիւններուն մէջ՝ հարենակորոյս բայց հայրենիքին չդաւաճանած։ Յակոբ Յակոբեանի ու Մուրադեանի աչքերով՝ նորաձեւ ու ոճային, իսկ Կալենցի, Մինասի եւ Սարեանի հոգիներուն մէջ՝  յաղթանակած վառ գոյներով մի հայ կին։ Եղեռն վերապրած, բայց եւ լաւատես։ Գաղթի ճամբան անցած բայց արժանապատիւ սերունդ դաստիարակած ազնուազարդ հայ կին։

Շուրջ 100 հագուստներու ցուցադրութեան գեղեցիկ այս հաւաքածոն մեծապէս տպաւորեց ներկաները, որոնք քար լռութեամբ, սակայն հմայքով, երբեմն յուզումով եւ ինչո՞ւ չէ նաեւ լաւատեսութեամբ հետեւեցան հայ կինը ներկայացնող տարազներուն այնքան տպաւորիչ հաւաքածոյին եւ մեծապէս գնահատեցին զայն։

Բացառիկ այս ցուցադրութեան հեղինակ Լիլիթ Մարգարեան, մեծապէս տպաւորուած ձեռնարկի նկատմամբ ցուցաբերուած հետաքրքրութենէն եւ քաջալերական ծափողջոյններէն, յուզումով սրտի իր խօսքը փոխանցեց եւ իր երախատագիտութիւնը յայտնեց ՀՕՄի Շրջանային Վարչութեան ու կազմակերպիչ յանձնախումբին, որ Ստեփանակերտի Սօսէ մանկապարտէզի շինարարութեան ազգանուէր ծրագրին զինք հրաւիրելուն եւ իր աշխատանքը Ամերիկայի Միացեալ Նահանգներուն մէջ ներկայացնելուն համար։

Ապա, հանդիսավար Դարբինեան բեմ հրաւիրելով ակնարկուած ծրագրի յանձնախումբի անդամներ Վիգի Մարաշլեանը, Սեդա Խոճայեանն ու Ժասիկ Ջառահեանը, ինչպէս նաեւ երեկոյի կազմակերպիչ յանձնախումբը, ներկայացուց զանոնք ներկաներուն, որոնք ջերմ ընդունելութեան արժանացան։

Վիքի Մարաշլեան, յանձնախումբի անունով ծաղկեփունջ մը նուիրեց Լիլիթ Մարգարեանի, առ ի գնահատանք եւ շնորհակալութիւն ներկայացուցած բացառիկ պատմական իր աշխատանքին համար։ Իսկ Ժասիկ Ջառահեան շնորհակալութիւն յայտնեց վարագոյրի ետեւ աշխատողներուն եւ յանձնախումբի բոլոր անդամներուն  եւ շեշտեց, ըսելով՝ «Մենք աշխատում ենք հաւաքաբար։ Յանձնախումբի անդամ  իւրաքանչիւր ընկերուհի իր ներդրումն է բերել։ Մենք աշխատում ենք մէկ նպատակի՝ Արցախի համար»։

Այնուհետեւ գործադրուեցաւ գեղարուեստական յայտագիր, որու ընթացքին ելոյթ ունեցան շրջանի սիրուած արուեստագէտներ Կարօ Սարաֆեան (Կիթար), Յարութ Փամպուքճեան, Ճանի Կարապետեան,Արմենչիկ, Անտրէ, Անի Քրիսթի եւ Արթիւր Յակոբեան (Mister X)։ Բոլորն ալ իրենց հրամցուցած երաժշտութեամբ եւ գեղեցիկչ երգերով մեծապէս ոգեւորեցին ներկաները։

Սրտի իր խօսքը փոխանցեց նաեւ յատուկ այս ձեռնարկի համար Ամերիկայի Միացեալ Նահանգներ հրաւիրուած Արցախի  հանրապետութեան փոխ վարչապետ զօրավար Արթիւր Աղաբէկեանը։ Բնական է, որ զօրավարը լոկ ձեռնարկին մասնակցելու համար չէր ժամանած Ամերիկա, այլ՝ անոր նպատակն ու կարեւորութիւնը հանրութեան բացատրելու, ինչպէս նաեւ անոր հանգանակային բաժինը աւելի աշխուժացնելու։

«Ամէն անգամ ձեզ հանդիպելուս։ Ամէն անգամ ձեզ հետ ծրագրելուս, արդէն ես հաւատացած եմ լինում, որ այդ ծրագիրը անպայման պսակուելու է յաղթանակով»։ Այսպէս սկսաւ իր պատգամը զօրավար Աղաբէկեան եւ ապա, փոխանցելով Արցախի իշխանութիւններու ողջոյնները, անդրադարձաւ Արցախի Ապրիլեան պատերազմի օրերուն եւ այնուհետեւ տեղի ունեցող իրադարձութիւններու մասին։

Ընդգծելով Արցախի ժողովուրդի եւ իշխանութիւններու քաջարի կեցուածքն եւ արձանագրած յաղթանակը, ըսաւ. «… մեր թշնամին մի բան տեսաւ։ Տեսաւ սառնասիրտ արցախցին, տեսաւ միասնական հայ ժողովուրդ, մի նպատակի շուրջ համախմբուած։ Լինել Արցախում մարտնջող զինուորի կողքին եւ անպայման այդ կռիւը պսակել յաղթանակով։ Վերջապէս թէ՛ ականատեսի եւ թէ՛մասնակցի աչքերով յայտարարում եմ, որ արցախցին այդ կռիւը դիմաւորեց սառնասրտութեամբ։ Ժամեր յետոյ, տասը հազարից աւել արցախցիներ արդէն զէնք էին վերցրել եւ շտապում էին մարտական դիրքեր, լինելու մեր զաւակների կողքին։ Կամաւոր այդ աշխատանքներին  ոչ միայն անմասն չմնաց ՀՕՄի Արցախի մեկուսի կառոյցը, այլ նաեւ ամենաաշխոյժ դերակատարութիւնը ստանձնեց»։

Յատուկ շնորհակալութիւն յայտնելով բոլոր ՀՕՄուհիներուն եւ յատկապէս ԱՄՆի Արեւմտեան  շրջանին, զօրավարը անգամ մը եւս ընդգծեց կանացի հսկայ այս կազմակերպութեան գործնական զօրակցութիւնը Արցախին, Արցախեան Պատերազմի առաջին օրէն իսկ։ Այսուհանդերձ, Աղաբէկեան ՀՕՄի իրականացուցած ամենամեծ ծրագիրը Արցախի համար նկատեց մանկապարտէզներու ծրագիրը եւ բացատրեց, ըսելով «… ՀՕՄը ճիշդ ժամանակին իրականացրեց մանկապարտէզի ծրագրերը։ Երբ ՀՕՄը Մանկապարտէզներ էր բացում Արցախի գիւղերում, պետական ոչ մի մանկապարտէզ չկար Արցախում։ Այսօր ի հարկ է այդ մանկապարտէզները 100 են հասնում։ Բայց երբ ՀՕՄը նախաձեռնեց Սօսէ մանկապարտէզը Ստեփանակերտում, յետոյ Տողում, Թաղլարում, Ականաբերդում  եւ այսպէս ութը մանկապարտէզ, այդ օրերին Արցախը չունէր այդ հնարաւորութիւնը կազմակերպելու այդ մանկապարտէզները։ Իսկ այդ մանկապարտէզները այդ օրերին յաճախում էին զոհուած զինծառայողի ընտանիքի երեխերք, սոցաեալապէս անապահով, վիրաւոր ազատամարտիկի երեխաներ։ Մի գուցէ հենց ՀՕՄի այդ ծրագիրն էր, որ վարակիչ դառաւ Արցախի Իշխանութիւնների համար, որ այնքան սպասուած է ամէն համայնքում Մանկապարտէզ ունենալը»։

Բարձր արժեւորելով ՀՕՄի նման գնահատելի նախաձեռնութեան մը իրականացումը, Աղաբէկեան շնորհակալութիւն յայտնեց բոլորին եւ յատկապէս Արեւմտեան ԱՄՆի ընկերուհիներուն, վստահեցնելով, որ ՀՕՄի Ստեփանակերտի Սօսէ Մանկապարտէզի շինարարութիւնը կ՚աւարտի ՀՕՄի Կեդր. Վարչութեան նախատեսած ժամանակին՝ այսինքն 2007-ի առաջին կիսամեակին։

Ապա շնորհակալական իր խօսքը ուղղելով մշակոյթի գեղեցիկ այդ կառոյցի շինարարութեան իրենց մասնակցութիւնը բերած բարերարներուն ըսաւ. «Սիրելի բարերարներ, ես գիտեմ որ ձեր ապրած կեանքում հարիւրաւոր, հազարաւոր նման բարեգործութիւններ էք իրականացրել։ Բայց հաւատացէք ամենամեծ բարեգործութիւնը ՝նուիրումն է այն երեխաներին, այն զաւակներին որոնք վաղը պէտք է զինուոր գրուեն, վաղը պէտք է Արցախի քաղաքացի լինեն»։

Եզրակացնելով, զօրավարը հաւաստիացուց նաեւ, թէ «… պատերազմի օրերին ամենաճիշդ ժամանակն է խօսել ապագայի մասի, խօսել ապագայի սերնդի մասին, խօսել այն գապիդալ ներդրումների մասին, որ պիտի անենք մենք, ի ուրախութիւն մեր բարեկամներին եւ ի տխրութիւն մեր թշնամիներին»։

Ոգեւորիչ այս պատգամէն ետք, շարունակուեցաւ գեղարուեստական յայտագիրը, որուն յաջորդեց ՀՕՄի Ստեփանակերտի Սօսէ մանկապարտէզի շինարարութեան արագ ընթացքը արտացոլող   տեսաերիզի ցուցադրութիւնը։

Պատմական այս երեկոն վերջ գտաւ ուշ գիշերին։ Ներկաները գոհունակութեամբ մեկնեցան տուն, ՀՕՄի մեծութեանը հպարտանքը ապրած բաւարարութեամբ եւ հայ կնոջ հզօրութեան

Post a comment