Blog

ՀՕՄը Յառաջադէմ Շրջանաւարտներ Պարգեւատրեց Հանրային Վարժարաններէն

ՀՕՄը Յառաջադէմ Շրջանաւարտներ

b0776ea0ff3c7ec4ba82e898c021ccc5_xsՊարգեւատրեց Հանրային Վարժարաններէն

Յունիս ամսուան առաջին Երկուշաբթին, ՀՕՄի կողմէ միշտ վերապահած է հանրային եւ հայկական երկրորդական վարժարաններու յառաջադէմ շրջանաւարտներուն։ Այդ երեկոյին, յատուկ գնահատագրեր եւ կրթանպաստ կը ստանան հանրային վարժարաններու այն շրջանաւարտները, որոնք իրենց աշխատասիրութեամբ եւ ազգային կեանքէն ներս որոշ առնչութիւն ունենալով, կը յուսադրեն իրենց շրջապատը։

Բնական, է այդ երեկոն նաեւ նպատակ ունի պարգեւատրեալ շրջանաւարտներուն եւ անոնց ընկերակցող հարազատներուն ծանօթացնելու Հայ Օգնութեան Միութեան առաքելութեան եւ հետապնդած նպատակներուն, շեշտելով ազգային պարտականութիւններու կարեւորութիւնը։

Այս տարի կարեւոր այս ձեռնարկը տեղի ունեցաւ Երկուշաբթի, 6 Յունիս 2016ի երեկոյեան ժամը 7ին, ՀՕՄի Կեդրոնը, աւելի քան 100 մասնակիցներու, որոնց կարգին էին նաեւ կարգ մը վարժարաններու տնօրէններ, ներկայացուցիչներ եւ խորհրդատուներ։

Բարի գալուստի ջերմ խօսքերով ներկաները ողջունեց Շրջանային Վարչութեան ատենապետուհի Ռեպեքա Պէրպէրեան, որ նաեւ յաջողութեան մաղթանքներով շնորհաւորեց շրջանաւարտներն ու անոնց ծնողները։  Ապա, անոնց ուշադրութիւնը հրաւիրեց ՀՕՄի լայնատարած մարդասիրական աշխատանքները արտացոլող տեսաերիզին վրայ, որ մեծ կեդրոնացումով եւ հիացմունքով դիտուեցաւ ներկաներուն կողմէ։

Տպաւորիչ տեսաերիզի ցուցադրութենէն ետք, Պէրպէրեան փոխանցեց Շրջանային Վարչութեան խօսքը եւ ըսաւ. «Իր առաքելութեան համաձայն, ՀՕՄը մեծապէս  կը քաջալերէ երիտասարդութիւնը բարձրագոյն ուսում ստանալու, որուն հաւատքով ալ, իր աւելի քան 100 տարիներու գոյութեան ընթացքին, հազարաւոր կրթաթոշակներ տրամադրած է հայ ուսանողներուն։ Ասոնց կարգին եղած են Արամ Հայկազի եւ Մուշեղ Իշխանի նման հայ բանաստեղծներ եւ արձակագիրներ»։ Պէրպէրեան մաղթեց, որ օրուան կրթանպաստ ստացողներէն ոմանք ալ հետեւին նոյն օրինակներուն եւ յոյս յայտնեց, որ նման կրթանպասները կը շարունակուին քաջալեր հանդիսանալ ուսանող եւ ժրաջան հայ երիտասարդութեան, որ միշտ իր ստացածը  վերադարձուցած է իր համայնքին ու հայրենիքին։

«Աւելի՛ն, ՀՕՄը կը յուսայ, որ  կրթանպաստ ստացող ձեզմէ շատեր, իրենց ակադեմական եւ  մասնագիտական ապագայ կեանքին մէջ անպայման զօրակցին ՀՕՄին», աւելցուց Պէրպէրեան եւ ապա, ներկայացուց օրուան պատգամախօս ատամնաբոյժ Վահագն Արսլանեանի կենսագրական գիծերը եւ հրաւիրեց զայն փոխանցելու իր պատգամը։

Տոքթ. Վահագն Արսլանեան ծնած է Պէյրութ, Լիբանան ազգանուէր ընտանեկան յարկի մը տակ։ Յաճախած է Ծննդավայրի Սուրէն Խանամիրեան Երկրորդական վարժարանը։ Փոքր տարիքին անդամակցած է ծննդավայրի ՀՄԸՄի մասնաճիւղը իբրեւ գայլիկ եւ ապա՝ սկաուտ։ 1981ին փոխադրուած է Ամերիկայի Միացեալ Նահանգներ եւ յաճախած է California College of Dental Training-ի բաժինը ուրկէ վկայուելէ ետք, ուսումը շարունակած է Լոս Անճելըսի գոլէճը եւ ապա՝ Քալիֆորնիոյ նահանգի Նորթրիճ համալսարանը, հետեւելով Քիմաբանութեան (Chemistry) ճիւղին։ 1989ին ընդունուած է Loma Linda University-ի  ատամնաբուժութեան բաժինը, ուրկէ իբրեւ ատամնաբոյժ վկայուած է 1993ին։  Համալսարանական տարիներուն, աշխատած է Ասպարէզի խմբագրական կազմին մէջ։ Իբրեւ ատամնաբոյժ կարեւոր պաշտօններ զբաղեցուցած է զանազան ատամնաբուժական կեդրոններէ ներս։ 2008էն ի վեր տնօրէնն է Ֆրեզնոյի ատամնաբուժական գործողութիւններու կեդրոնի։ Միաժամանակ գործօն մասնակցութիւն կը բերէ իր շրջանի հայկական կեանքէն ներս։

Ստանձնելով բեմը, Արսլանեան առաջին հերթին շնորհակալութիւն յայտնեց իրեն ընծայուած պատիւին համար, շնորհաւորեց շրջանաւարտները եւ յատուկ երախտագիտութիւն յայտնեց անոնց ծնողներուն, որոնք ամէն ջանք թափած են իրենց զաւակներուն ուսումը ապահովելու եւ զանոնք յաջողութեան ճիշդ ուղիով առաջնորդելու համար։ Ապա, իրենց ապագայի գծով ճիշդ ընտրութիւն կատարելու պատասխանատուութիւնը յիշեցնելով շրջանաւարտներուն,

խրախուսեց զանոնք ինքնավստահութեամբ եւ քաջութեամբ առաջ ընթանան, երբեք չյուսահատին դժուարութիւններէ եւ միշտ կեդրոնանան իրենց նպատակներու իրականացման վրայ։

Այնուհետեւ, լաւ սովորութիւններ ընկալելու կարեւորութիւնը շեշտելով, Արսլանեան կեդրոնացաւ մարդու  մարմնի, մտքի եւ ազգային ոգիի կարեւորութեան վրայ։

•Հոգատար ըլլալ մարմնի առողջութեան, սննդարար ուտելիքներ ուտելով։

•Ընդարձակել մտային հորիզոններն ու գիտելիքներու պաշարը, որոնց հարստացման համար ընթերցել կարեւոր եւ օգտակար նիւթեր, որ այս օրերուն այնքան դիւրացած է արդիական միջոցներու շնորհիւ։

•Ազգային ոգին զօրացնելու համար անդամակցիլ եւ աշխոյժ գործունէութիւն ցուցաբերել հայկական մեր կազմակերպութիւններուն։ Նիւթապէս եւ բարոյապէս օգտակար հանդիսանալ մեր ազգին ու հայրենիքին։

Եզրակացնելով տոքթ. Արսլանեան  մատնանշեց, թէ անցնող 24 Ապրիլը մեզի համար զգաստութեան ազդանշան էր։ Մեր ազգը տակաւին դժուարութիւններ կը դիմագրաւէ Արցախի մէջ։ Հայ զինուորը արեան գնով կը պաշտպանէ մեր սահմանները եւ մենք պարտաւոր ենք մեր արդար պահանջքները հետապնդել եւ արդարութեան հասնիլ։ Իսկ այս բոլորի իրականացման մէջ, մեծ դեր ունի մեր ուսանող երիտասարդութիւնը։

Տոքթ. Արսլանեանի իմաստալից դասախօսութիւնը երկարաշունչ ծափողջոյններով ընկալուեցաւ ներկաներուն կողմէ, մեծ ոգեւորութիւն ստեղծելով սրահէն ներս:

Ձեռնարկի վերջին բաժնով Ռեպեքա Պէրպէրեան օրուան պարգեւատրեալ աշակերտները հրաւիրեց բեմ, որոնց յանձնեց Շրջ. Վարչութեան կողմէ տրամադրուող գնահատագրերը, իսկ համապատասխան մասնաճիւղերու վարչութիւնները անոնց յանձնեցին իրենց կրթանպաստները։

Պաշտօնական յայտագիրը վերջ գտաւ յիշատակի խմբանկար մը ստանալէ ետք։ Այնուհետեւ, տեղի ունեցաւ հիւրասիրութիւն, որու ընթացքին մասնաճիւղերու վարչութիւնները մօտէն ծանօթացան պարգեւատրուած շրջանաւարտներուն եւ անոնց ապագայ ծրագիրներուն:

Ձեռնարկը վերջ գտաւ ժամը 9:30ին: Ներկաները գոհունակութեամբ մեկնեցան տուն, լաւապէս ծանօթանալէ ետք ՀՕՄի անձնուէր գործունէութեանց ու մարդասիրական ծառայութիւններուն։

Յայտնենք, թէ յիշեալ աշակերտներէն անկախ, ՀՕՄի Ֆրեզնոյի Մայր Մասնաճիւղը, իր շրջանի հանրային երկրորդական վարժարաններէն երկու յառաջադէմ շրջանաւարտներ պարգեւատրեց, իսկ ՀՕՄի Սոֆիա մասնաճիւղը՝ երեք։ Միւս կողմէ, ՀՕՄի Ֆինիքսի Արարատ մասնաճիւղը որոշած է չորս աշակերտներու կրթանպաստ տրամադրել։

Այս հաշիւով, ՀՕՄի Արեւմտեան ԱՄՆի շրջանը այս տարի երկրորդական վարժարաններու 43  յառաջադէմ շրջանաւարտներու կրթանպաստ տրամադրել, քաջալերելով անոնց մէջ հայկական ու ազգային ոգին։

Բարի երթ մեր շրջանաւարտներուն: ՀՕՄի մաղթանքն է, որ անոնք լաւատեսութեամբ նետուին իրենց կեանքի նոր ասպարէզը եւ ինքնավստահութեամբ յաղթահարեն իրենց դժուարութիւնները։

Post a comment