Blog

ՀՕՄի 95րդ Շրջանային Պատգամաւորական Ժողովը Որոշեց Հաստատակամութեամբ Շարունակել ՀՕՄի Առաքելութիւնը

ՓԱՍԱՏԻՆԱ.- Հայ Օգնութեան Միութեան ԱՄՆի Արեւմտեան շրջանի 95րդ Շրջանային Պատգամաւորական ժողովը տեղի ունեցաւ 16-19 Յուլիս 2015, Փասատինայի Հայ Կեդրոնէն ներս, հիւրընկալութեամբ՝ Շրջանային Վարչութիւնը, որուն համար յատուկ յանձնախումբ մը նշանակած էր։

3bd383cdf9446912a35458166e99234d_xsԺողովի բացման հանդիսութեան ներկայ գտնուեցան Թեմիս առաջնորդ Մուշեղ արք. Մարտիրոսեանի ներկայացուցիչ Ս. Սարգիս եկեղեցւոյ հովիւ Պօղոս Քհնյ. Փալթայեան, ՀՕՄի Կեդրոնական Վարչութեան անդամներ ատենապետ Վիքի Մարաշլեան եւ ներկայացուցիչ Անի Քէշիշեան, ՀՅԴ Փասատինայի Լեռնավայր Կոմիտէի ներկայացուցիչ Սարգիս Թաթիկեան, Շրջանային Վարչութեան հիւրեր, ընտրեալ պատգամաւորներ եւ դիտող ՀՕՄուհիներ։

Ամերիկայի, Հայաստանի եւ ՀՕՄի քայլերգներու ունկնդրումէն ետք, իր օրհնութիւնները փոխանցեց Պօղոս քհնյ. Փալթայեան եւ ապա, կարդաց Թեմիս առաջնորդ Մուշեղ արք. Մարտիրոսեանի պատգամը՝ ուղղուած ՀՕՄի բարձրագոյն ժողովին, որուն մէջ յատկապէս ընդգծուած էր. «Տարիներու թաւալումին հետ, մեր ժողովուրդի կեանքը ապրած է բարեփոխումներ, ՀՕՄի նպաստաշնորհումի գործունէութիւնն ալ ապրած է փոփոխութիւններ, սակայն անոր ոգին եւ էութիւնը մնացած են անփոփոխ, իբրեւ խորագիր ունեցած է նուիրաբերել ու նուիրուիլ ի նպաստ մեր ժողովուրդին, Հայաստանին, Արցախին, Ջաւախքին ու հայկական բոլոր օճախներուն»։

Շրջանային Վարչութեան անունով ներկաները ողջունեց Շրջանային Վարչութեան համա-ատենապետուհի Ռեպեքա Պէրպէրեան։ Ան յատուկ շնորհակալութիւն յայտնեց ներկաներուն, իրենց Շրջանային Վարչութեան եւ ընդհանրապէս ՀՕՄին զօրակցութեան համար ու հրաւիրեց զանոնք վայրկեան մը յոտնկայս յարգելու յիշատակը նախորդ տարեշրջանին մեզմէ առ յաւէտ հեռացած ընկերուհիներուն, որոնց անուններն ու նկարները ցուցադրուեցան պաստառի վրայ։

«Պատգամաւորներու պատասխանատուութիւնն ու ակնկալութիւններն են, որ հիմը պիտի դնեն շինիչ եւ մտածուած աշխատանքային տարեշրջան մը» ըսաւ ընկերուհին իր պատգամին մէջ եւ շնորհակալութիւն յայտնեց Պատգամաւորական Ժողովի կազմակերպիչ յանձնախումբին եւ գրասենեակի պաշտօնէութեան, իրենց պատասխանատուութիւնները լաւապէս կատարելուն  համար։

Կեդրոնական Վարչութեան պատգամը փոխանցեց Անի Քէշիշեան, որ անհրաժեշտ գտաւ ՀՕՄի շարքերուն մէջ ընդգրկելու նաեւ երիտասարդ ուժեր։ Ապա, Հայոց Ցեղասպանութեան 100ամեակը հայ ժողովուրդի համար «վերապրումի,, վերականգնումի եւ յաղթանակի տարի» որակելով, բարձր գնահատեց նուիրեալ ՀՕՄուհիները, որոնք տասնամեակներ շարունակ հայապահպանման ջահը սերունդէ սերուն կը փոխանցեն։ Ան խիստ անհրաժեշտ գտաւ ՀՕՄի Ստեփանակերտի Սօսէ մանկապարտէզի շէնքի վերանորոգման աշխատանքը, որուն հանգանակային  աշխատանքներուն արդէն իսկ սկսած է հանգանակային յատուկ յանձնախումբով մը։

Սրտի իր խօսքը փոխանցեց նաեւ համա-ատենապետուհի Մարալ Մաթոսեան, որ նկարագրելէ ետք ՀՕՄուհիի իսկական տիպարը, երախտագիտութեամբ շնորհաւորեց ՀՕՄի հիմնադիր կուսակցութեան՝ ՀՅԴի 125ամեակը եւ շնորհակալութիւն յայտնեց ՀՕՄի հանդէպ ցուցաբերած իր հայրական գուրգուրանքին, իսկ գոհունակութեամբ նշելով Հայոց Ցեղասպանութեան 100ամեակին ՀՕՄուհիի ուխտի վերանորոգման գործին,  ընդգծեց կարեւորութիւնը առաւել պատասխանատուութեամբ շարունակելու ազգային մեր պարտականութիւնները։ Ապա, շրջանի ՀՕՄի բարձրագոյն ժողովը բացուած յայտարարեց։

Նախքան Ժողովի օրակարգերուն անցնիլը, ելոյթ ունեցաւ շրջանի ՀՅԴ Կեդր. Կոմիտէի ներկայացուցիչ դոկտ. Վիգէն Յովսէփեան եւ ըսաւ. «Բոլորս անխտիր, նոյն մարտահրաւէրներուն հովիտին մէջ կանգնած ենք եւ մեր հայեացքները դէպի նոյն լերան գագաթին ուղղուած են։ Մեր ամէնօրեայ կեանքի ընթացքին մէջ, շատ յաճախ, մենք նկատի չենք առներ, թէ ինչպիսի եռուն համայնքի մը մէջ կը գտնուինք։ Այդ համայնքը այսօր աճ մը կ՚արձանագրէ, քանակական աճ այո, բայց մեր բոլորիս  պարտականութիւնն է վերածել զայն որակի, որպէսզի այդ որակն ալ գայ նպաստելու եւ մեր առաքելութիւնը աւելի առաջ տանելու՝ ի փառս մեր ժողովուրդին եւ մեր հայրենիքին»։ Յովսէփեան գնահատեց ընթացաւարտ Շրջանային Վարչութեան աշխատանքը եւ յաջողութիւն մաղթեց ժողովին։

Շրջանի 26 մասնաճիւղերէն 63 լիազօր պատգամաւորներ մասնակցեցան կարեւոր այս ժողովին։ Կեդր. Վարչութեան լիազօր ներկայացուցիչն էր Անի Քէշիշեան։ Ժողովին ներկայ գտնուեցան նաեւ ՀՕՄի Կեդր. Վարչութեան ատենապետուհի Վիքի Մարաշլեան եւ ՀՅԴ Կեդր. Կոմիտէի ներկայացուցիչ դոկտ. Վիգէն Յովսէփեան։ Շրջանային Վարչութեան հիւրերն էին Յասմիկ Տէրտէրեան եւ իրաւաբան Գասպար Ճիւալաքեան։

Ժողովի կողմէ ընտրուած Իրաւասութիւնները ճշդող յանձնախումբի կողմէ պատգամաւորներու լիազօրագրերու ստուգումէն եւ վաւերացումէն ետք, ժողովի օրինականութիւնը հաստատուեցաւ եւ ընտրուեցաւ ժողովի մնայուն դիւանը. ատենապետներ՝ Նայիրի Տէրտէրեանին (հայերէնի) եւ Լարա Գազանճեանին (անգլերէնի), իսկ քարտուղարներ՝ Մարալ Փօլատեանին եւ Գարմէն Լիպարիտեանին (անգլերէն), Մանուշակ Տէկիրմէնճեանին եւ Անգինէ Յակոբեանին (հայերէն)։

Ժողովի Օրէնսգէտի պատասխանատուութիւնը ստանձնեց ժողովի դիւանը, հսկիչի պատասխանատուութիւնը սիրայօժար ստանձնեցին ՀՕՄի Սօսէ մասնաճիւղէն 8 ընկերուհիներ, իսկ ժողովի թղթակցութիւնը վստահուեցաւ ՀՕՄի գրասենեակին։

Պատգամաւորական ժողովի օրակարգի վաւերացումէն ետք, ժողովը ընտրեց իր Ընտրողական, Բանաձեւի եւ Արխիւային  յանձնախումբերն ու խորհրդակցական ձայնով հրաւիրեալները, յանձինս Լենա Պօզոյեանի, Սեդա  Խոճայեանի, Մարի Արապեանի եւ Ռոզ Ալթունեանի։

Նկատի ունենալով, որ Շրջ. Վարչութիւնը տարեկան իր տեղեկագիրը, Ընկերային Ծառայութեան եւ Հոգեբանական կեդրոնի տեղեկագրերուն հետ միասին նախապէս յղած էր պատգամաւորներուն, ժողովականներուն լուսաբանական հարցումներու առիթ տրուեցաւ: Այնուհետեւ ներկայացուեցաւ Շրջանային Վարչութեան տարեկան նիւթական տեղեկագիրը, որուն շուրջ նաեւ լուսաբանական հարցումներ կատարելէ ետք, Անի Քէշիշեան կարդաց Կեդրոնական Վարչութեան միամեայ ամփոփ տեղեկագիրը: Այնուհետեւ ցուցադրուեցաւ տեսաերիզ մը ՀՕՄի Սօսէ մանկապարտէզներու եւ յատկապէս Ստեփանակերտի մանկապարտէզի նոր շէնքի շինարարութեան ծրագրին մասին, որուն համար նշանակուած է հանգանակային յանձնախումբ մը։ Վերջինի անունով ելոյթ ունեցաւ Սեդա Խոճայեան եւ լայն բացատրութիւններ տուաւ նախաձեռնուած հանգանակային աշխատանքներու մասին եւ քաջալերեց ժողովականները մասնակցելու կարեւոր այս հանգանակային նախաձեռնութեան։ Նիւթի կարեւորութենէն խանդավառուած եղան սրտաբուխ նուիրատուութիւններ։

Ուրախալի այս երեւոյթէն ետք կարդացուեցան Արխիւային եւ Հաշուեքննիչ յանձնախումբերու զեկոյցները, որոնց յաջորդեց Շրջանային Վարչութեան նիւթական եւ բարոյական տեղեկագրերու ըստ էութեան քննարկումներ, բարձր գնահատելով ընթացաւարտ Շրջանային Վարչութեան միամեայ գործունէութիւնը յոյժ գնահատելի բանաձեւումով արժեւորեցին զայն։

Այնուհետեւ, ժողովականները, իրենց նախընտրութեամբ վեց խմբակներու բաժնուելով քննեցին եւ համադրեցին մասնաճիւղերէն ներկայացուած առաջարկները, որոնք կ՚առնչուէին կրթական, քարոզչական, հանգանակային եւ անդամակցութեան ծրագիրներուն, Գաղութային, Հայաստանի, Արցախի եւ Ջաւախքի օգնութեան աշխատանքներուն, կանոնագրային կէտերու եւ շրջանի կողմէ ՀՕՄի 71րդ Համահայկական Պատգամաւորական ժողովին ներկայացուելիք  առաջարկներուն։ Եղան նաեւ անհատական առաջարկներ: Ներկայացուած բոլոր առաջարկները ժողովին կողմէ քննարկուելէ ետք, անոնց կարեւորագոյնները իբրեւ բանաձեւ որդեգրուեցան։

Ժողովը կարգ մը շինիչ փոփոխութիւններէ ետք, վաւերացուց նաեւ Շրջանային Վարչութեան երկամեայ նախահաշիւը եւ ընտրեց հետեւեալ  ինը հոգինոց Շրջանային Վարչութեան կազմը, յառաջիկայ երկու տարիներու համար. Ռիթա Հինդլեան, Ռէպեքա Պէրպէրեան, Այտա Պապայեան, Սաթենիկ Ղազարեան, Մարալ Մաթոսեան, Վիքի Քաթարոյեան, Մարօ Փափազեան, Թամար Ուրիշեան եւ Նանիք Քիւփէլեան։

Ժողովը ընտրեց նաեւ հետեւեալ չորս պատգամաւորները, ՀՕՄի Համահայկական Պատգամաւորական ժողովին համար, որ պիտի գումարուի 4-9 Հոկտեմբեր 2015ին, Հայաստանի մէջ. Նայիրի Տէրտէրեան, Մարալ Մաթոսեան, Արուսեակ Մելքոնեան եւ Թամար Ուրիշեան։ Յայտնենք, թէ այս խմբակին պիտի միանայ նաեւ Շրջանային Վարչութեան ներկայացուցիչը։

Հաշուեքննիչ յանձնախումբի ընտրութենէն ետք, դիւանի անունով շնորհակալական ելոյթ ունեցաւ Նայիրի Տէրտէրեան։ Յատուկ յուշատախտակներով գնահատուեցան ընթացաւարտ Շրջանային Վարչութեան անդամները։ Ժողովը վերջ գտաւ երեկոյեան ժամը 8ին։

Այնուհետեւ նորընտիր Շրջանային Վարչութիւնը, գումարեց առաջին իր լիագումար ժողովը, մասնակցութեամբ Պատգամաւորական ժողովի դիւանի եւ Կեդր. Վարչութեան ներկայացուցիչ Անի Քէշիշեանին, որու ընթացքին ընտրեց իր դիւանը հետեւեալ ձեւով.- Ռեպէքա Պէրպէրեան (ատենապետ), Մարալ Մաթոսեան (փոխ-ատենապետ), Ռիթա Հինդլեան (Քարտուղար), Այտա Պապայեան (Գանձապահ), Թամար Ուրիշեան (հաշուապահ), իսկ խորհրդականներ՝ Նանիք Քիւեէլեան, Սաթենիկ Ղազարեան, Վիքի Քաթարոյեան եւ Մարօ Փափազեան։

Post a comment