Blog

ARS 13th Armenian Cultural & Food Festival (Bilingual)

ԿԼԷՆՏԷՅԼ.- Հայ Օգնութեան Միութեան Արեւմտեան ԱՄՆի Շրջանային Վարչութիւնը, իր ժողովուրդի բուռն փափաքին ընդառաջելով, որոշած է վերսկսիլ անհամբերութեամբ սպասուող տարեկան երկօրեայ իր փառատօնը, որուն կազմակերպչական դժուարին աշխատանքները վստահած է փորձառու միութենական անդամներէ կազմուած յանձնախումբի մը։ Տօնական այս ձեռնարկը նուիրուած է ՀՕՄի Օրուան նշումին եւ նպատակ ունի հայկական մեր մշակոյթն ու աւանդութիւնները ներկայացնելու հայկական եւ տեղական մեր համայնքներուն, որպէսզի անոնց ցոյց տայ հայկական մեր մշակութային հարստութիւնը, որ մեր ազգին ու հայրենիքին յարատեւման գլխաւոր առանցքը կը հանդիսանան։

Այս տարի երկօրեայ գեղեցիկ այս նախաձեռնութիւնը պիտի իրագործուի 29-30 Սեպտեմբեր 2018ի շաբաթավերջին, Կլէնտէյլի «Սիվիք» հանդիսասրահի շրջափակէն ներս, 1401 N. Verdugo Road, Glendale, CA 91208: Փառատօնը բաց պիտի ըլլայ Շաբաթ, կէսօրէ ետք ժամը 1էն մինչեւ կէս գիշեր, իսկ Կիրակի, կէսօրէ առաջ ժամը 11էն մինչեւ երեկոյեան ժամը 7։

Փառատօնի երկօրեայ յայտագրերը պիտի հրամցուին Սիվիք Հանդիսասրահի երկրորդ յարկին վրայ, որոնց հայկական երգ ու պարի խանդավառ ելոյթներով մաս պիտի կազմեն շրջանի սիրուած երգիչներն ու ծանօթ պարախումբերը։ Պիտի բեմականացուի նաեւ հայկական աւանդական հարսանիքը։ Հմայիչ յայտագրին մաս պիտի կազմէ նաեւ հայկական տարազներու ցուցադրութիւնը։

Ժրաջան մեր ՀՕՄուհիները, ոչ միայն երկու օրերուն հրամցուելիք համադամ ճաշերը պիտի պատրաստեն, այլ նաեւ հաճոյքով անոնց վաճառքը պիտի կատարեն։ Փառատօնի մուտքի նուէրն է երեք տոլար, իսկ տասը տարեկան եւ վար երեխաներու մուտքը՝ ազատ:

Հանդիսասրահի առաջին յարկի վրայ պիտի ցուցադրուին հայկական մեր մշակոյթն ու աւանդութիւնները յիշեցնող իրեր։ Նոյն յարկի վրայ յատուկ անկիւններ պիտի տրամադրուին շրջանի հայրենակցական միութիւններուն, որպէսզի իրենց աւանդութիւններն ու յատկանշական իրերն ու ճաշերը ցուցադրեն։ Հայկական մեր վարժարաններուն, քոյր միութիւններուն, հայկական եւ տեղական կազմակերպութիւններուն եւ հաստատութիւններուն եւս պիտի յատկացուին անկիւններ, որպէսզի կարենան իրենց քարոզչութիւնը կատարել։

Չմոռնալով մեր փոքրիկները, նոյն յարկի վրայ անոնց համար եւս նախատեսուած են մանկական խաղեր, արուեստի աշխատանքներ եւ մրցումներ։ Կը սպասուին նաեւ գեղեցիկ անակնկալներ։

ՀՕՄի 13րդ փառատօնի կազմակերպումով, մարդասիրական հսկայ այս կազմակերպութիւնը կու գայ յստակացնելու, թէ Հայ Օգնութեան Միութիւնը, ծառայական իր գործունէութեան առընթեր, նաեւ, ջանք չի խնայեր պահպանելու մեր մշակոյթն ու աւանդութիւնները։

29-30 Սեպտեմբեր 2018ի շաբաթավերջին, Կլէնտէյլի «Սիվիք» հանդիսասրահը, թող բոլորիս ժամադրավայրը հանդիսանայ, որպէսզի հաւաքաբար վերապրինք հայկական մեր հարազատ մթնոլորտը, վայելենք հայկական երգն ու պարը եւ յագենանք հայկական մեր մշակոյթով։

Յաւելեալ մանրամասնութիւններու համար հաճեցէք դիմել ՀՕՄի Շրջանային Վարչութեան գրասենեակ, հեռաձայնելով (818) 500-1343 թիւին կամ office@arswestusa.org ենամակի հասցէով:

ՀՕՄի ԱՄՆի Արեւմտեան շրջանը հիմնուած է 1984ին, իր կեդրոնատեղին ունենալով Քալիֆորնիոյ նահանգի Կլէնտէյլ քաղաքին մէջ: Ան 26 մասնաճիւղերով մարդասիրական կազմակերպութիւն մըն է, չորս նահանգներու մէջ գործող աւելի քան 1,200 անդամներով: Շրջանի ՀՕՄը ունի Ընկերային Ծառայութեան բաժանմունք, հոգեբանական կեդրոն, Միօրեայ վարժարաններ, կը հովանաւորէ զանազան պատանեկաներիտասարդական ծրագիրներ, կը տրամադրէ կրթական եւ այլ նպաստներ: Մանրամասնութիւններու համար հաճեցէք այցելել ՀՕՄի www.arswestusa.org կայքէջը կամ հեռաձայնեցէք (818) 500-1343 թիւին:

###

Glendale, Calif.- The Armenian Relief Society (ARS) of Western USA, Regional Executive is pleased to announce that it will be restarting the tradition of holding the ARS Armenian Festival, which will be dedicated to celebrating ARS Cultural Day and the many offerings of Armenian culture and traditions. A dedicated team of committee members has preparations underway for this much-anticipated community event.

This year’s festival will be held on September 29-30, 2018 at the Glendale Civic Auditorium, located at 1401 N. Verdugo Road, Glendale, CA 91208. Festival hours are 1 p.m. – 12 midnight on Saturday, September 29th and 11 a.m. – 7 p.m. on Sunday, September 30th.

The festival’s program will be featured on the second floor of the auditorium, where well-known Armenian singers and dance groups will also perform. A traditional Armenian wedding will also be presented, alongside traditional Armenian costumes.

A wide variety of delectable foods, prepared by ARS members, will be sold. Admission is only $3 per person and free for children 10 years of age and younger.

The first floor of the auditorium will hold exhibits and items featuring the Armenian culture, as well as booths where compatriotic unions will display their cultural exhibits, sample foods, and more. Armenian schools, as well as local organizations and establishments, will also have a designated space for outreach. A children’s corner will have entertainment, games, and crafts for youth of all ages.

Through the organization of the 13th Annual Armenian Cultural & Food Festival, the Armenian Relief Society of Western USA affirms its mission of preserving the Armenian culture and heritage.

For additional information, contact the ARS Regional Headquarters at (818) 500-1343 or office@arswestusa.org.

The Armenian Relief Society of Western USA, established in 1984 and with regional headquarters in Glendale, CA, has 26 chapters and more than 1,200 members in four western states. The ARS operates a Social Services Division and Child, Youth, and Family Guidance Center, one-day schools, and funds numerous youth programs, scholarships, and relief efforts. For additional information, visit www.arswestusa.org or call (818) 500-1343.

###

Post a comment