Blog

ARS Anahid Chapter Saturday School’s Armenian Cultural Celebration (Armenian)

Հայ Մշակոյթի Տօնակատարութիւն Հ.Օ.Մ.-ի «Անահիտ» Մասնաճիւղի Շաբաթօրեայ Վարժարանի

2017 տարեշրջանի, Նոյեմբեր 4-ի առաւօտուն, Հ.Օ.Մ.-ի «Անահիտ» մասնաճիւղի Շաբաթօրեայ վարժարանի աշակերտները պատրաստ էին փառաբանելու հայոց մշակոյթի հսկաներուն անմահ գործը՝ Ֆերահեանի Տիգրանեան սրահին մէջ: Այդ օր, անոնք բացառիկ տրամադրութեամբ ժամանած էին դպրոց, ուրախ էին, որովհետեւ պիտի ցուցադրէին իրենց ամբարած գիտութիւնը հայ գիրին եւ հայ մշակոյթին մասին, որ սորված էին անցնող երկու ամիսներու ընթացքին:

Աշակերտները՝ նախքան իրենց տեղերը գրաւելը, հաճոյքով դիտեցին հայ մշակոյթը ցոլացնող որմանկարները, զոր զարդարած էին սրահին պատերը:

Շաբաթօրեայի տնօրէնուհի ընկերուհի Աշխէն Փափազեան հակիրճ բացման խօսքով բացատրականը տուաւ օրուան խորհուրդին: Ներկայացուց վաստակաշատ, երկար տարիներու փորձառու ուսուցչուհի ընկերուհի Ազատուհի Ղազարեանը, որ հրաւիրուած էր աշակերտներուն փոխանցելու հայոց մշակոյթի իմաստը:

Ընկերուհի Ղազարեան իւրայատուկ ոճով բացատրեց աշակերտներուն Մշակոյթի Օրուան եւ թարգմանչաց տօնին իմաստը: Շեշտեց, որ հայերը առաջին ազգը եղած են, որ ընդունած են քրիստոնէութիւնը, սակայն հայերէնով տառեր չունէինք, որ մեր լեզուով կարդայինք Ս. Գիրքը: Բացատրեց հրամայականը հայ տառերու ստեղծման, Մեսրոպ Մաշտոցի, Սահակ Պարթեւի եւ Վռամշապուհ թագաւորի անզուգական գործը, որուն յաջորդեց թարգմանիչներու հսկայական աշխատանքը, Ս. Գիրքի թարգմանութիւնը եւ հայ մշակոյթի ծաղկումը:

Ընկերուհին եզրափակեց, թէ Հայոց գիրերու ստեղծումով ազգ մը փրկուեցաւ: Մենք հաւատարիմ ժառանգորդներն ենք մեր նախնիներուն, եւ կ’ուխտենք հաւատարիմ մնալ մեր մշակոյթին եւ մեր աւանդութիւններուն:

Յայտագիրը շարունակուեցաւ աշակերտներուն ելոյթներով:

Աւարտական դասարանէն Կէպի Եղիայեան զգացումով ասմունքեց Շահանդուխտի «Հայոց Լեզուի Հրաշքը»:

Մանկապարտէզի փոքրերը խանդավառութեամբ երգեցին «Այբ Բեն Գիմ», «Մայրենի Լեզու» եւ «Մեծացեր Ենք Մենք Արդէն»:

Բարձր կարգի աշակերտներէ կազմուած երգչախումբը երգեցին «Այբբենարան Մեր Հայոց», «Հայ Ենք Մենք», երգի եւ երաժշտութեան ուսուցչուհի՝ Տիկ. Անժէլա Եկորեան:

Խանդավառութիւնը գագաթնակէտին հասցուցին հայկական պարերը, ուսուցչուհի՝ Արմինէ Խաչատուրեանի կողմէ պատրաստուած:

Հանդէսի վերջաւորութեան տնօրէնուհին շնորհակալութիւն յայտնեց ընկերուհի Ազատուհի Ղազարեանին իր յաջող դասախօսութեան համար: Նաեւ շնորհակալութիւն յայտնեց Շաբաթօրեայ վարժարանի յանձնախումբի անդամներուն եւ ուսուցչուհիներուն իրենց նուիրումին համար:

Տեղի ունեցաւ հիւրասիրութիւն: Սեղանը զարդարուած էր  հայկական աւանդական ուտելիքներուվ:

Կատարուեցան նուիրատւութիւններ:

Վարձքը կատար բոլոր անոնց, որոնք նպաստեցին ձեռնարկի յաջողութեան:

Թղթակցութիւնը՝ մասնաճիւղէն

Post a comment