Blog

ARS Anahid Chapter’s New Member Oath Ceremony (Armenian)

ՀՕՄԻ «Անահիտ» Մասնաճիւղի Երդման Արարողութիւն Նորագիր ՀՕՄուհիներու

Սան Ֆերնանտօ Հովիտի, ՀՕՄի «Անահիտ» մասնաճիւղի վարչութիւնը, սքանչելի գաղափարը ունեցած էր կազմակերպելու նորագիր ՀՕՄուհիներու երդման արարողութեան հանդիսութիւն մը, Հոկտեմբեր 26, 2017ի երեկոյեան ժամը 7:30ին Ֆերահեան վարժարանի Տիգրանեան սրահին մէջ:

Նախքան երդման արարողութեան թուականը, 9 նորագիր ընկերուհիները, վարչական կազմին եւ ընկերուհի Սօսի Փօլատեանի հետ ունեցան դաստիարակչական-ուսուցողական հանդիպում մը: Ընկերուհի Սօսի՝ նորագիրներու կնքամայրը, յստակ բացատրականը տուաւ ՀՕՄուհիներու պարտականութեանց, շեշտեց ազգին ծառայելու պատասխանատւութեան լրջութիւնը: Բացատրեց այս մեծ ընտանիքին կատարած հսկայական ծառայութիւնները Հայաստանի թէ սփիւռքի տարածքին գտնուող  բոլոր հայ անկարներուն, մշակոյթի կեդրոններուն, հայոց բանակին եւ բոլոր անոնց, որոնք անհրաժեշտ կարիքը ունին օգնութեան:

Ձեռնարկի երեկոյեան ներկայ էին ընկերուհիներ՝ Ռիթա Հինդլեան, ՀՕՄի Կեդրոնական վարչութեան անդամ, Սիլվա Փօլատեան՝ Շրջանային վարչութեան ատենապետուհի, Արշօ Աւագեան՝ «Անահիտ» մասնաճիւղի մօտ Շրջանային Վարչութեան կապը,Շրջանային Վարչութեան անդամներ Արմէնուհի Թովմասեան եւ Անի Պոսթանեան, ՀՕՄի ընկերուհիներ եւ  բարեկամներ:

Յայտագիրը սկսաւ հայկական եւ ՀՕՄի զոյգ քայլերգներով։ Հակիրճ  կերպով բացման խօսքը կատարեց մասնաճիւղի վարչութեան ատենապետուհի ընկհի. Անգինէ  Ակոբեան: Ան ողջունեց ներկաները, ուրախութիւն յայտնեց ՀՕՄի 9 նորագիրներուն, որոնք կամաւոր կերպով եկած էին մաս կազմելու նուիրեալներու մեծ փաղանգին:

Ցուցադրուեցաւ ՀՕՄի պատմականը ներկայացնող հետաքրքրական  տեսաերիզ մը, որու միջոցաւ ներկաները ականատես եղան այս մեծ ընտանիքին հսկայական գործունէութիւններուն, ցեղասպանութեան տարիներէն առաջ եւ շարունակաբար հայ ժողովուրդի կեանքի  տագնապալի շրջաններուն, սերունդէ-սերունդ փոխանցուող ջահը, որ դիմացած է փոթորիկներուն եւ կը մնայ միշտ անմար:

Յաջորդեց Երդման Արարողութիւնը 9 նորագիրներու, կնքամայրութեամբ վաստակաշատ ՀՕՄուհի Սօսի Փօլատեանի, անոնք հպարտութեամբ եւ յուզումով ուխտեցին «Հաւատարիմ ըլլալ Հայ Օգնութեան Միութեան եւ անոր Ամերիկայի Միացեալ Նահանգներու Արեւմտեան Շրջանին, ջանալ իրագործել անոնց հետապնդած նպատակները եւ յարգել Կանոնագրի բոլոր տրամադրութիւնները»:

Ընկերուհի Սօսի Փոլատեան տարիներու իր փորձառութիւնը օգտագործելով տուաւ իր պատգամը, շեշտելով, որ ՀՕՄը բարձունքի հասած է, շնորհիւ ուխտեալ ընկերուհիներու անշահախնդիր զոհաբերական ոգիին: Ընկերուհիին խօսքերը դրոշմուեցան նորագիրներու սրտերուն եւ մտքերուն մէջ: Ան երդեալ ընկերուհիներուն նուիրեց ՀՕՄի կրծքանշաններ:

Ընկհի. Արուսեակ Մելքոնեան, հոգիէն բխած յուզմունքով ասմունքեց օրուան պատշաճ ոտանաւոր մը, Ժագ Յակոբեանի «Այս Քոյրերը», ճշգրիտ պատկերը տալով ՀՕՄի նուիրեալ ընկերուհիներուն:

Երգչուհի Գայանէ Զագարեան  իր քնքոյշ եւ թովիչ ձայնով, մեներգեց ազգային եւ ժողովրդական երգեր, արժանանալով ներկաներուն բուռն գնահատանքին: Ազգային Ֆերահեան վարժարանի աշակերտուհի՝ Մարինօր Պալուզեան, երգեհոնի վրայ նուագեց հայկական երաժշտութիւն, խանդավառելով ներկաները: Յայտագիրը ճոխացնող արուեստագիտուհիները գնահատուեցան ծաղկեփունջերով: Պաշտօնական բաժնին յաջորդեց հիւրասիրութիւն: Ստեղծուեցաւ ընկերային, մտերմիկ զրոյցներու պահ մը, որ շարունակուեցաւ մինչեւ երեկոյեան ուշ ժամերը: Վարձքը կատար բոլոր նուիրեալ ՀՕՄուհիներուն:

Թղթակցութիւնը՝ մասնաճիւղէն

 

 

 

 

Post a comment