Blog

ARS Welcomes the 2017 New Year (Armenian)

ՀՕՄի Արեւմտեան Շրջանը Մեծ Ոգեւորութեամբ դիմաւորեց Նոր Տարին

Երեքշաբթի, 3 Յունուար 2017ին, աւելի քան 300 ՀՕՄուհիները համախմբուած էին Կլէնտէյի «Պրանտվիւ» սրահը, միասնաբար եւ նոր ակնկալութիւններով տօնելու նոր տարուան գալուստը։

Հերթաբար սրահ փութացած ՀՕՄուհիները գեղեցիկ մաղթանքնրով դիմաւորեց կաղանդ պապան, լայն ժպիտներ պարգեւելով անոնց սիրասուն դէմքերուն։ Աւելի՛ն ան նաեւ ողջոյնի քաղցր խօսքերով շնորհաւորեց ներկաներուն Նոր Տարին եւ Ս. Ծնունդը, մաղթելով անոնց, որ «հայկական մայրական անսահման ժպիտներ» եւ ապա բեմը յանձնեց Շրջանային Վարչութեան ատենապետուհի Ռեպեքա Պէրպէրեանին, փոխանցելու իր պատգամը։

Պէրպէրեան առաջին հերթին ողջունեց պաշտօնական հիւրերը, որոնց կարգին էին ՀՕՄի Կեդրոնական Վարչութեան փոխ-ատենապետուհի Նայիրի Տէրտէեանն ու քարտուղաը Ռիթա Հինդլեանը, Կեդր. Կոմիտէի ներկայացուցիչ Կարօ Իսբէնճեանը, ՀՄԸՄի Շրջանային Վարչութեան անդամ Արամ Երեմեանը, Ոսկրածուծի նուիրատուներու Հիմնարկի ներկայացուցիչ դոկտ. Վերժին Մատէլեան, Հայ Դատի Դաստիարակչական յանձնախումբի ատենապետ Ալիս Պետրոսեանը, Ազգային Առաջնորդարանի Տիկնանց Միութեան անդամ Ալվարդ Բարսեղեանը, ՀՕՄի Ընկերային Ծառայութեան հաշուապահական հաստատութեան տնօրէն տէր եւ տիկ.  Վահէ եւ Էւա Ղարիպեանները եւ այլ հիւրեր։

Ապա, շնորհաւորելով ՀՕՄի մեծ ընտանիքի եւ իւրաքանչիւր ներկայի Նոր Տարին եւ Ս. Ծնունդը, մատնանշեց ըսելով. «Տրտմութեամբ եւ միաժամանակ ուրախութեամբ կը դիմաւորենք Նոր Տարին։ Տրտմութեամբ կ՚եզրափակենք անցնող տարին, որովհետեւ հայրենի սահմաններու շարունակական կռիւները մեր երիտասարդ զինուորներու կեանքերը կը խլեն։ Տխրութեամբ կը դիմակայենք սուրիահայ գաղթականները, որոնք ապահով վայր մը կը փնտռեն։ Ցաւալի է, որ նաեւ տնազուրկներ եւ յուսահատներ կը տեսնենք մեր շրջապատէն ներս։ Այսուհանդերձ, ձեզմէ իւրաքանչիւրը մեծ հաճոյքով եւ լաւատեսութեամբ կը դիմաւորէ նոր տարին, կարօտեալ մեր հայրենակիցներուն օգտակար հանդիսանալու պատրաստակամութեամբ»։

Ընկերուհին երախտագիտութիւն յայտնելով ՀՕՄի մեծ ընտանիքի անդամ նուիրեալներուն, վստահեցուց, որ հակառակ սպառնացող բոլոր դժուարութիւններուն, ՀՕՄի Շրջանային Վարչութեան, Ընկերային Ծառայութեան եւ Հոգեբանական Կեդրոնի պաշտօնէութիւնը, ինչպէս նաեւ ՀՕՄի իւրաքանչիւր մասնաճիւղ, առօրեայ դրութեամբ պիտի շարունակէ օգտակար հանդիսանալ կարիքաւորներուն եւ իր համայնքին։

Ձեռնարկի գեղարուեստական յայտագիրը սիրայօժար խանդավառեցին շրջանը գտնուող հայրենի արուեստագէտները։

Դերասան Գուրգէն Կարապետեան ասմունքեց Համօ Սահեանէն եւ Գէորգ Էմինէն երկու տպաւորիչ բանաստեղծութիւններ։

Կիսաբաց Լուսամուտ մարդասիրական հաստատութեան տնօրէն Հրաչ Մուրատեան փոխանցեց ամանորեայ իր մաղթանքները եւ շնորհակալութիւն յայտնեց Արեւմտեան ԱՄՆի շրջանին, որ կը զօրակցի կարօտեալ ընտանիքներու օգնութեան իր ծրագիրներուն։

«Տայնամիք Տուօ» պարախումբը ներկայացուց գեղեցիկ պարեր իսկական տայնամիք մթնոլորտ մը ստեղծելով սրահէն ներս։

Դերասան-երգիչ Կոր Եփրեմեանը ժողովրդական երգերու փունջ մը մեներգելով մեծ ոգեւորութիւն ստեղծեց սրահէն ներս։

Զոյգ երգերով երեկոյին առաւել փայլք տուին երգչուհի Արմինքան եւ Օփերայի ծանօթ երգչուհի Անահիտ Ներսիսեանը։ Մէջ ընդ մէջ մթնոլորտը խանդավառեց եւ բոլոր ներկաները պարի հանեց նաեւ DJ Mahig-ը։

Արուեստագէտները ներկայացուց եւ ՀՕՄի անունով անոնց շնորհակալութիւն յայտնեց ՀՕՄի Շրջանային Վարչութեան գրասենեակի տնօրէն Ժասիկ Ջառահեանը, որ նաեւ գլխաւորեց ձեռնարկի հանգանակային բաժինը։

Մթնոլորտէն մեծապէս խանդավառուած մասնաճիւղերն ու ներկայ անհատներ գնահատելով ՀՕՄի Ամանորեայ խրախճանքի կազմակերպումը սրտաբուխ նուիրատուութիւններ կատարեցին։

3 Յունուար 2017ի երեկոն, շրջանի ՀՕՄի անդամներու համախմբման առիթ մը հանդիսանալէ անկախ, եղաւ նաեւ վերանորոգման հիանալի առիթ մը։ Ուշ երեկոյին սրահէն մեկնած իւրաքանչիւր միութենական գոհունակութեամբ մեկնեցաւ սրահէն, ՀՕՄի առաքելութեան եւ նպատակներուն իրագործման կամաւորը հանդիսանալու հաստատակամութեամբ։

Post a comment