Blog

Speech Delivered by ARS Regional Executive Board Member Arsho Avakian – ARS Hollywood Mayr Chapter’s 100th Anniversary Event (March 4, 2018) – Armenian

Բարձրաշնորհ Մուշեղ Արքեպիսկոպոս Մարտիրոսեան, Արժանապատիւ Հոգեւոր Հայր, ՀՕՄի Կեդր. Վարչութեան անդամ համեստափայլ ընկհ. Մարալ Մաթոսեան, Յարգելի հիւրեր, համակիրներ, Շատ սիրելի ՀՕՄուհիներ`

Այսօր հպարտանքով մասնակից կը դառնանք ՀՕՄի Հոլիվուտի Մայր մասնաճիւղի 100ամեակի հրապարակային այս տօնախմբութեան։

Ահա մասնաճիւղ մը, որ Հոլիվուտի սրտին մէջ ծնունդ առաւ, ծաղկեցաւ, բարգաւաճեցաւ եւ ամբողջ 100 տարիներ մարդասիրական իր ծառայութիւններով օգտակար հանդիսացաւ ոչ միայն իր ժողովուրդին, այլ նաեւ իր շրջապատին, առանց խտրութեան։

Նուիրեալ մասնաճիւղ մը, որ 50 տարիներ առաջ, օտար այս ափերուն վրայ կանխատեսելով ՃԵՐՄԱԿ ՋԱՐԴԻ վտանգը, ինքնավստահութեամբ Շաբաթօրեայ իր վարժարանը բացաւ եւ անձնազոհ իր կրթական մշակներու միջոցաւ, սերունդներ հայօրէն դաստիարակեց եւ կասկած չունինք, որ նոյն ոգիով պիտի շարունակէ ազգային այդ պարտականութիւնը։

Ահա իրականութիւն մը, որ միայն հպարտանք կը պատճառէ բոլորիս: Ականատես կ՚ըլլանք երեւոյթի մը, որ անգամ մը եւս կը հաստատէ, թէ ՀՕՄը ծնած է հոգալու իր ժողովուրդին մարդկային կարիքները եւ պահպանելու անոր մշակոյթն ու աւանդութիւնները։

Բնական է մասնաճիւղը 100 տարիներ գոյատեւեց, շնորհիւ իր անցեալի ու ներկայի ղեկավարներուն, անձնազոհ իր անդամուհիներու նուիրումին եւ իր  շուրջ համախմբուած համակիրներու հաւատքին:

Այս պահուն, սրտի մեծ գոհունակութեամբ իմ եւ Շրջանային Վարչութեան ընկերուհիներուս անունով կը շնորհաւորեմ ՀՕՄի Հոլիվուտի Մայր մասնաճիւղի 100ամեակը եւ իր Շաբաթօրեայ վարժարանի 50ամեակը, այն հաստատ համոզումով, որ ան իր գործունէութեան երկրորդ 100ամեակը նորանոր նուաճումներու եռանդով պիտի դիմաւորէ եւ բազմապատկուած շարքերով պիտի շարունակէ հարազատ թարգմանը հանդիսանալ ՀՕՄի առաքելութեան:

Բարի երթ եւ նորանոր նուաճումներ կը մաղթենք մասնաճիւղին, սպասելով լաւագոյնը:

Կեցցէ՛ք բոլորդ:

 

Post a comment