Blog

Speech Delivered by ARS Regional Executive Board Member Nancy Bederian – ARS Javakhk Fund’s Annual Fundraiser (May 11, 2018) – Armenian

Բարձրաշնորհ Մուշեղ Արքեպիսկոպոս Մարտիրոսեան, Առաջնորդ՝ Ամերիկայի Արեւմտեան Թեմի Արժանապատիւ Հոգեւոր Հայր, ՀՕՄի Կեդրոնական եւ Շրջանային Վարչութեանց ներկայացուցիչներ, Քոյր Կազմակերպութիւններու ներկայացուցիչներ, հիւրեր, համակիրներ եւ Շատ սիրելի ՀՕՄուհիներ`

Երբ Ջաւախք կ՚ըսենք, անկասկած կը մտաբերենք պատմական այն շրջանը, որ  Հայաստանի մէկ մասնիկն է եւ մենք յատուկ գուրգուրանք կը ցուցաբերենք  անոր նկատմամբ։ Այս գծով ՀՕՄի Շրջանային Վարչութիւնը ձեռնածալ չէ, որուն լաւագոյն վկայութիւնը ՀՕՄի կողմէ հովանաւորուող Ջաւախքի երիտասարդական կեդրոններն են։ Ազգանպաստ եւ մարդասիրական այս աշխատանքներու յաջողութիւններուն մէջ արժանավայել դեր կը կատարեն մեր ազգասէր նուիրատուները, որոնք հաւատալով Ջաւախքը կանգուն պահելու հրամայականին, իրենց նուիրատուութիւններով մեծապէս կը նպաստեն անոր ծրագիրներու յաջողութեանց։

Մենք երախտապարտ ենք մեր նուիրատուներուն։ Շնորհակալ ենք բոլորէն։ Ուրախ ենք, որ այդ նուիրատուներէն այսօր մեր մէջ կը գտնուի վաստակաշատ ՀՕՄուհի, բարերար եւ Ջաւախքի հզօրացման միշտ նպաստող ընկհ. Հայկոյշ Գեղինեան-Քոհլըրը։ Ընկերուհին երկար տարիներ գլխաւորած է ՀՕՄի Ջաւախք Հիմնադրամի յանձնախումբը, անոր ձեռնարկներու յաջողութեանց նիւթապէս եւ բարոյապէս  նպաստած է, իսկ վերջերս անգամ մը եւս Ջաւախքի նկատմամբ իր սէրն ու զօրակցութիւնը յայտնելու համար $100,000 իշխանական նուիրատուութեամբ մը արձագանգեց Ախալցխայի երիտասարդական կեդրոնի վերանորոգման աշխատանքներուն։

Սիրելի ընկհ. Հայկոյշ, մենք երախտապարտ ենք ձեզ, որ ազգային ձեր պարտականութիւնը կը կատարէք հայ ժողովուրդին, Հայաստանին, Արցախին եւ յատկապէս Ջաւախքին նկատմամբ։ Վստահ եղէք, որ ձեր ցուցաբերած քաջալերանքով, Ջաւախքի հայկական դիմագիծը կը պահպանուի եւ ջաւախքցի երիտասարդը կառչած կը մնայ իր պապենական հողերուն։

Բնական է, Ջաւախքի ուղղուած ծրագիրներու յաջողութիւնները կը պարտինք նաեւ ՀՕՄի Ջաւախք Հիմնադրամի յանձնախումբին, որուն անդամները ոչ միայն հաւատք կ՚ընծայեն անոր պատմական կարեւորութեան, այլ նաեւ համոզումով աշխատանք կը տանին անոր գոյատեւման նպաստող միջոցներու իրականացման:

Շնորհակալութիւն կը յայտնենք նաեւ ձեզի սիրելի ներկաներ, որ ձեր ներկայութեամբ մեծապէս նպաստեցիք ազգօգուտ այս ձեռնարկի յաջողութեան։ Ուրախ ենք, որ կը գիտակցիք Ջաւախքի կարեւորութեան եւ անոր օժանդակելու ձեր պարտականութիւնը կը կատարէք։

Ջաւախքը մերն է եւ մերը պիտի մնայ։

Բարի եկած էք: Բարի վայելում:

Post a comment