Blog

Հոգիի Խաղաղութիւն Ննջեցեալ Բոլոր ՀՕՄի Անդամներուն

Ամէն տարի, Փետրուարի վերջին Կիրակին վերապահուած է Հայ Օգնութեան Միութեան։ Նոյն օրը, շրջանի Հայաստանեայց Առաքելական բոլոր եկեղեցիներէն ներս, Արեւմտեան թեմի առաջնորդ Մուշեղ արք. Մարտիրոսեանի յատուկ կարգադրութեամբ, յաւարտ Ս. Պատարագի, հոգեհանգստեան պաշտօն կը կատարուի մեզմէ առ յաւէտ բաժնուած ՀՕՄուհիներուն եւ ՀՕՄի Բարերարներուն յիշատակին։

Այս տարի, յատկանշական այդ օրը Կիրակի, 28 Փետրուարն էր։ Շրջանի ՀՕՄի 26 մասնաճիւղերէն բազմաթիւ անդամներ փութացած էինք իրենց շրջաններու եկեղեցիները, յարգելու յիշատակը իրենց մահացած սիրելի միութենականներուն, ծունկ մը աղօթք կատարելու եւ մոմ մը վառելու անոնց հոգիներու խաղաղութեան համար։

Նոյն օրը, բոլոր եկեղեցիներէն ներս, պատարագիչ հոգեւորականները յատուկ անդրադարձ ունեցան ՀՕՄի սրբազան գործունէութեան, մատուցած ծառայութեանց ու ՀՕՄի անդամներու անխոնջ աշխատանքին ու նուիրումին։ Անոնց յիշատակեցին մանաւանդ այն բոլոր ՀՕՄուհիները, որոնք իրենց արդար բաժինը բերելով այդ  գործունէութեան, առ յաւէտ մեկնած են այս աշխարհէն, իրենց ետին ձգելով գեղեցիկ յիշատակներ։ Հոգեւոր հայրերը յիշեցուցին նաեւ որ 2016 տարին, Արամ Ա. Վեհափառի կողմէ յայտարարուած է «Ծառայութեան տարի», որ գեղեցկօրէն կը դրսեւորէ ՀՕՄի առաքելութիւնը, որ կեդրոնացած է ընդհանրապէս մարդկութեան եւ յատկապէս հայ ժողովուրդին ծառայելու նպատակին, հաւատարիմ մնալով «Ժողովուրդիս հետ, Ժողովուրդիս համար» իր խորիմաստ նշանաբանին։

Հոգեհանգստեան պաշտօններէն ետք, բոլոր մասնաճիւղերն ալ, յատուկ հաւաքներով  հոգեսուրճ կամ մատաղ բաժնեցին հաւատացեալ ժողովուրդին, յիշելով իրենց հանգուցեալ  սիրելիներուն անուններն ու նուիրումի ոգին։

«Այս նախաձեռնութիւնը պատճառ կը հանդիսանայ, որ մենք ոչ միայն յարգանքի տուրք մատուցելով չմոռնանք մեր մահացած ՀՕՄի անդամները, այլ նաեւ արժեւորենք անոնց թողած ժառանգը եւ վերանորոգուած ուխտով շարունակենք իրականացնել ՀՕՄի առաքելութիւնն ու հետապնդած նպատակները», ընդգծեց Շրջանային Վարչութեան ատենապետ Ռեպեքա Պէրպէրեանը, Սրբոց Նահատակաց եկեղեցւոյ մէջ կատարուած հոգեհանգստեան պաշտօնէն  եւ մատաղօրհնէքէն ետք։

ՀՕՄի Շրջանային Վարչութիւնը իր խորազգաց ցաւակցութիւնները կը յայտնէ շրջանի  մասնաճիւղերու վարչութիւններուն, անդամներուն եւ բոլոր ընտանիքներուն, իրենց անդամներուն եւ հարազատներուն կորուստներուն համար։

* * *

ՀՕՄի ԱՄՆի Արեւմտեան շրջանը հիմնուած է 1984ին, իր կեդրոնատեղին ունենալով Քալիֆորնիոյ նահանգի Կլէնտէյլ քաղաքին մէջ: Ան 26 մասնաճիւղերով մարդասիրական կազմակերպութիւն մըն է, չորս նահանգներու մէջ գործող աւելի քան 1,200 անդամներով: Շրջանի ՀՕՄը ունի Ընկերային Ծառայութեան բաժանմունքը, հոգեբանական կեդրոնը եւ կը հովանաւորէ զանազան պատանեկան-երիտասարդական ծրագիրներ, կրթանպաստներ եւ այլ նպաստներ: Մանրամասնութիւններու համար հաճեցէք այցելել ՀՕՄի www.arswestusa.org կայքէջը կամ հեռաձայնեցէք (818) 500-1343 թիւին:

Post a comment