Blog

ՀՕՄի Ծառայութեան Տարին Երախտագիտութեամբ Յատկանշուեցաւ

Կիրակի, 10 Ապրիլ 2016ը, պատմական գեղեցիկ էջ մը բացաւ շրջանի Հայ Օգնութեան Միութեան պատմութեան մէջ։ Օր մը երախտագիտութեան, օր մը ազգասիրութեան եւ մանաւանդ՝ ծառայասիրութեան։

Հայ Օգնութեան Միութեան Արեւմտեան ԱՄՆի Շրջանի Շրջանային Վարչութիւնը, նկատի ունենալով, որ ՆՍՕՏՏ Արամ Վեհափառ Հայրապետը 2016 տարեշրջանը Ծառայութեան Տարի յայտարարած է, գեղեցիկ գաղափարը յղացաւ, յատուկ ձեռնարկով մը, իր երախտագիտութիւնը յայտնելու ՀՕՄի այն անդամներուն եւ ՀՕՄի վարժարաններու ուսուցիչ-ուսուցչուհիներուն, որոնք երկար տարիներ նուիրումով ծառայած են հայ ժողովուրդին եւ ազգասիրութեամբ դաստիարակած անոր մատղաշ սերունդները։

Ձեռնարկը տեղի ունեցաւ Կլէնտէյլի Brandview Banquet Hall-ը, ուր փութացած էին շուրջ 400 ՀՕՄի անդամներ, բարեկամներ եւ համակիրներ, ականատես ու մասնակից ըլլալու պատմական գեղեցիկ այս երեկոյին։ Հոն էին շրջանի ՀՕՄի մօտ Կեդրոնական Վարչութեան կապ Մարալ Մաթոսեանը, Կեդր. Վարչութեան քարտուղար Ռիթա Հինդլեանը, Կլէնտէյլի նորընտիր քաղաքապետ Փոլա Տիվայնը, բազմաթիւ հիւրեր եւ յատկապէս 50 եւ աւելի տարիներ ՀՕՄին ծառայած ալեզարդ ընկերուհիներ։

Ձեռնարկի հանդիսավարութիւնը ձեռնհասօրէն կատարեց վաստակաշատ ՀՕՄուհի, ազգային մշակ եւ ՀՕՄի վարժարաններու խնամակալ մարմնի ատենապետուհի Սռնա Մատարեան։ Ձեռնարկը սկիզբ առաւ սիրուած երգիչ Արա Սահակեանի Ամերիկեան եւ Հայաստանի քայլերգներու մեներգումով, որուն յաջորդեց ՀՕՄի քայլերգի խմբերգումը՝ մասնակից աշխոյժ ՀՕՄուհիներու կողմէ։

Ապա, հանդիսավարը ներկաները հրաւիրեց վայրկեան մը յոտնկայս յարգելու յիշատակը

Արցախի Հանրապետութեան սահմանները պաշտպանող նահատակ խիզախ զինուորներուն եւ իրենց հողին կառչած մնացած հայորդիներուն, որոնք զոհ գացին ատրպէյճանական  անարգ ոճիրին։

Այնուհետեւ Մատարեան բացատրելով օրուան նպատակը, բարձր գնահատեց ՀՕՄի մեծ ընտանիքն ու անոր առաքելութեան հաւատարիմ անդամները, որոնք հաւատքով եւ նուիրումով կը ծառայեց հայ ժողովուրդին,Սփիւռքի եւ հայրենիքի մէջ։ Իսկ վեր առնելով Արցախի հանրապետութեան կարեւորութիւնը, կոչ ըրաւ ներկաներուն օգնութեան ձեռք երկարելու անոր, որուն ժողովուրդը աւելի քան երբեք սփիւռքի զօրակցութեան կարիքը ունի։

«Արցախի ամբողջականութիւնը կասկածէ վեր է, որուն հողային տարածքէն ոչ մէկ մասնիկ կարելի է զիջիլ», համոզումով հաստատեց ընկերուհին։

Շրջանային Վարչութեան պատգամը փոխանցեց ատենապետուհի Ռեպեքա Պէրպէրեան, որ առաջին հերթին հրաւիրեց ներկաները ծափողջոյններով գնահատելու այն ընկերուհիները, որոնք երկար տարիներ օգտակար հանդիսացած են հայկական մեր համայնքին, որուն համար ալ օրուան ձեռնարկը նուիրուած է անոնց։ Պէրպէրեան նաեւ երախտագիտութիւն յայտնեց ՀՕՄի անձնազոհ այն ընկերուհիներուն, որոնք Արցախի սահմանային գիծերու վրայ օգտակար կը հանդիսանան այն զինուորներուն, որոնք արեան գնով կը պաշտպանեն մեր հողերը։

«Անցեալ շաբթուան կէսերուն սկիզբ առած վայրագութիւններէն նկատեցինք, թէ մեր Արցախի ընկերուհիներուն արձագանգը փաստն է ՀՕՄի անցեալի 100 տարիներու խիզախութեան ու պայքարին։ Մեր ընկերուհիներու ցուցաբերած հոգատարութիւնը՝ Հայոց Ցեղասպանութեան որբերուն, Սպիտակի երկրաշարժի զոհերուն, կամ տեղական համայնքներու կարիքներուն կը յաւերժացնեն մեր կազմակերպութիւնը։ Միասնական ջանքերով եւ մեր ընկերուհիներու շարունակական եռանդով է, որ մենք կը կարողանանք ծառայել մեր յարափոփոխ համայնքներուն եւ կ՚արձագանգենք անոնց նոր տագնապներուն եւ փոփոխուող հանգամանքներուն» ընդգծեց Պէրպէրեան։

Ապա, անդրադառնալով ՀՕՄի ձեռնարկած զանազան ծրագիրներուն, որոնց կարգին տնազուրկներու ծրագրի նախաձեռնութեան, եւ յատկապէս նորաստեղծ ՀՕՄի Արցախ Հիմնադրամի ստեղծման,  ընկերուհին հպարտանքով մատնանշեց ՀՕՄի մասնաճիւղերու եւ անդամներու անմիջական պատրաստակամութիւնը՝ օգտակար հանդիսանալուԱրցախի կանչին եւ կարեւորեց 10, 20, 30, 40 եւ 50 անկիւնադարձային տարիներու կարեւորութիւնը, չմոռնալով ՀՕՄի վարժարաններու անձնազոհ մշակները, որոնց համար պիտի կատարուին երախտագիտական պարգեւատրումներ։

Եզրակացնելով, ընկերուհին բարձր գնահատեց եւ շնորհակալութիւն յայտնեց ՀՕՄի Ընկերային Ծառայութեան եւ ՀՕՄի հոգեբանական կեդրոններու, ինչպէս նաեւ Շրջանային Վարչութեան պաշտօնէութեանց, որոնք միասնական եւ նուիրեալ աշխատանքով կ՚իրականացնեն ՀՕՄի նպատակները։

Ատենապետուհիի գեղեցիկ խօսքերէն ետք յաջորդաբար տեղի ունեցան ՀՕՄուհիներու պարգեւատրումները, որոնք մերթ ընդ մերթ ընդմիջուեցան մեր սիրելի արուեստագէտներու երգերու գեղեցիկ մեկնաբանութիւններով։

Առաջին հերթին,հրաւիրուեցան ՀՕՄի շարքերէն ներս 50 եւ աւելի տարիներ ծառայած ՀՕՄուհիները, որոնք հայ ժողովուրդի բարօրութեան համար կատարած իրենց յարատեւ գործունէութեան, նուիրումին ու ծառայութեան՝ արժանացան ՀՕՄի Կեդրոնական Վարչութեան յատուկ Պատուոյ Գնահատագրին, որ իւրաքանչիւրին յանձնուեցաւ Կեդրոնական Վարչութեան անդամներ Ռիթա Հինդլեանի եւ Մարալ Մաթոսեանի ձեռամբ։ Յուզիչ էր պահը, ի տես վաստակաշատ այս ընկերուհիներու արժեւորման, որոնցմէ ոմանք տակաւին աշխուժութեամբ եւ ուրիշներ դանդաղ քայլերով, սակայն ինքնավստահ եւ հպարտութեամբ ստանձնեցին իրենց արժանաւոր գնահատագրերը, արժանանալով ներկաներու անկեղծ ու երկար ծափողջոյններուն։

Ապա, բեմ հրաւիրուեցաւ ՀՕՄի ընկերային Ծառայութեան Գրասենեակներու տնօրէնուհի Սօնա Ցնծալեանը, որուն Ռեպեքա Պէրպէրեան յանձնեց յուշատախտակ մը, առ ի բարձր գնահատենք իր ղեկավարած գրասենեակներու մատուցած անսահման եւ նուիրեալ ծառայութիւնը հայկական մեր Համայնքին։  Բեմ հրաւիրուեցան նաեւ նոյն գրասենեակներէն ներս տասը եւ աւելի տարիներ ծառայած պաշտօնեաները, որոնց եւս գնահատագրեր յանձնուեցան առ ի երախտագիտութիւն «Շրջանի հայութեան մեծապէս օգտակար հանդիսանալուն, համբերատար աշխատանքին եւ ՀՕՄի հանդէպ ցուցաբերած անսահման նուիրումին»։

Ճաշի դադարէն ետք, բեմ հրաւիրուեցաւ ՀՕՄի Հոգեբանական Կեդրոնի տնօրէն Տոքթ. Իդա Քարայեան, որուն եւս Շրջանային Վարչութեան ատենապետուհին յուշատախտակ մը յանձնեց, առ ի բարձր գնահատանք՝ «Հայկական մեր Համայնքին մտային առողջութեան մատուցած իր նուիրեալ ու անսակարկ աշխատանքին»։ Պէտք է ընդգծել նաեւ, թէ տոքթ. Քարայեան 1988ի Հայաստանի ահաւոր երկրաշարժի օրերէն ի վեր նուիրեալ աշխատանք տարած է նաեւ հայրենիքէն ներս։

Ապա հերթաբար պարգեւատրուեցան քառասուն, երեսուն, քսան եւ տասը տարիներ ծառայած ՀՕՄուհիները, որոնց կուրծքերը զարդարուեցան ՀՕՄի ոսկեայ/արծաթեայ խորհրդանիշը ներկայացնող կրծքանշաններով, իրենց ծառայած տարիներու համապատասխան։ Այսպէս քառասուն տարիներու անձնազոհ իրենց ծառայութեան համար պարգեւատրուեցան 77 ընկերուհիներ, Երեսուն տարիներու՝ 52, քսան տարիներու՝61 եւ տասը տարիներու՝ 84։ Կրծքանշանները յանձնեցին Շրջանային Վարչութեան անդամներ՝ Ռեպեքա Պէրպէրեան, Մարօ Փափազեան, Անի Պոսթանեան, Թամար Ուրիշեան, Վիքի Քաթարոյեան, Գարմէն Լիպարիտեան, Այտա Պապայեան եւ Սաթենիկ Ղազարեան,

Նոյն օրը, յատուկ վկայագրերով պարգեւատրուեցան նաեւ ՀՕՄի Վարժարաններէն ներս 10 եւ աւելի տարիներ պաշտօնավարած ուսուցիչ-ուսուցչուհիները, առ ի երախտագիտութիւն՝ «ՀՕՄի Վարժարաններէն ներս երկար տարիներու իրենց ծառայութեան, Հայ մանուկին ազգային դաստիարակութեան, Հայերէն լեզուի եւ մշակոյթի պահպանման համար թափած ճիգերուն»։ Այս բոլորէն անկախ, ՀՕՄի Սանթա Մոնիքայի Կարս Մասնաճիւղի ուրբաթօրեայ վարժարանի ուսուցիչ եւ ՀՕՄի Լա Գրեսէնթայի Թալին մասնաճիւղի Շաբաթօրեայ վարժարանի երկարամեայ տնօրէն պրն. Գէորգ Պետիկեան առանձին յուշատախտակով մը գնահատուեցաւ, հայկակն եւ ՀՕՄի վարժարաններէն ներս աւելի քան 45 տարիներու ծառայութեան համար։ Այո, պարգեւատրուեցան 43 արժանաւոր ազգային մշակներ, որոնք ՀՕՄի առաքելութեան իրականացման համար իրենց թանկագին ժամանակը տրամադրելով, ՀՕՄի հոգածութեան յանձնուած մատղաշ սերունդները հայօրէն կը դաստիարակեն։

Այս բոլորէն անկախ, եղան նաեւ պարգեւատրման գեղեցիկ այլ անակնկալներ։ Կլէնտէյլի նորընտիր քաղաքապետ Փոլա Տիվայն, բարձր գնահատելով ՀՕՄի գրասենեակներու ընդհ. տնօրէնուհի Ժասիկ Ջառահեանի աւելի քան 25 տարիներու տեղական եւ միջազգային ծառայութիւնները ,Կլէնտէյլի քաղաքապետարանի անունով յատուկ գնահատագիր մը յանձնեց անոր։ Նահանգային Խորհուրդի անդամներ Ատրին Նազարեան եւ Նահանգային ծերակուտական  Քավըն Տը Լիոն եւս գնահատագրեր յղած  էին  ՀՕՄի Ընկերային Ծառայութեան գրասենեակին եւ ՀՕՄի հոգեբանական կեդրոնին։

Եզակի այս երեկոյին առաւել փայլք տուին սիրուած արուեստագէտներ Արթիւր Յակոբեան (Mister X), Սալբի Մայիլեան, Արցախէն ժամանած սիրուած երգիչ Անտրէն, բոլորին հոգիները գրաւած Երեւանի Ա. Տիգրանեան Մանկական Երաժշտական Դպրոցի սաները եւ օրուան գլխաւոր երգիչ Արա Սահակեանը։ Անոնք իրենց հրամցուցած ազգային, յեղափոխական եւ Արցախի նուիրուած երգերով թնդացուցին սրահը, առաւել ազգասիրութեամբ լեցնելով ներկաներուն սրտերը։

Երախտագիտական գեղեցիկ այս երեկոն վերջ գտաւ գիշերուան ժամը 10ին։ Ներկաները մեծ ոգեւորութեամբ մեկնեցան տուն, իրենց հետ տանելով գեղեցիկ յուշեր եւ Արցախին օգտակար հանդիսանալու պատրաստակամութեամբ։

Post a comment