Blog

ՀՕՄի Շրջանային Վարչութեան Ղեկավարման Միօրեայ Սեմինար

ՀՕՄի Շրջանային Վարչութիւնը, գործակցութեամբ դաստիարակչական իր յատուկ յանձնախումբին, կազմակերպած է միօրեայ ղեկավարման սեմինար մը, որ տեղի պիտի ունենայ Շաբաթ, 23 Յունուար 2016ին, առաւօտեան ժամը 10էն սկսեալ մինչեւ կէսօրէ ետք ժամը 5, Նախագահ Ռոնալտ Ռէկընի  անուան գրադարանը, 40 Presidential Dr., Simi Valley, CA 93065։

Եզակի այս սեմինարի նիւթերու համադրումը պիտի կատարէ իրաւաբան Գասպար Ճիւալաքեան, իսկ շահեկան դասախօսութիւնները պիտի ներկայացուին հետեւեալ յաջորդականութեամբ.-

Ա. Կլոր Սեղան։

•ԱՄՆի Արեւմտեան շրջանի Հայ Դատի Յանձնախումբի ատենապետ իրաւաբան Նորա Յովսէփեան, պիտի դասախօսէ «Համայնքի ղեկավարը»  նիւթը

•Լոս Անճելըսի քառաքապետարանի վերահսկիչ Ուընտի Գրուըլ՝ «Կիները քաղաքականութեան մէջ»

•ՀՅԴ Կեդր. Կոմիտէի անդամ Վաչէ Թովմասեան՝ «Երիտասարդ Ղեկավարը»

Բ. Կլոր Սեղան։

•Ընկերութեանց Գործադիր Տնօրէն եւ Խորհրդատու Տարօն Տէր Խաչատուրեան՝ «Յաջողութեան ծրագրաւորումը»

•Դատաւոր Հուրի Սանդըրսըն՝ «Հակարմարտութիւններու Լուծում»

•ԱՄՆի Արեւմտեան շրջանի Հայ Դատի գրասենեակի վարիչ տնօրէն Էլէն Ասատըրեան՝ «Քարոզչութիւն եւ հաղորդակցութիւն»

«Մեզի համար շատ կարեւոր է այս սեմինարի յաջողութիւնը, որուն արհեստավարժ դասախօսները պիտի հրամցնեն մեր հանրութեան օգտակար հանդիսանալու լաւագոյն միջոցները։ Կը հրաւիրենք յատկապէս մեր երիտասարդութիւնը, ՀՕՄի փորձառու անդամներուն հետ միասին մասնակցելու այս դաստիարակիչ աշխատանքին, որպէսզի մօտէն ծանօթանայ ՀՕՄին, ինչպէս նաեւ ղեկավար ըլլալու յատկութիւններուն եւ անոնց կարեւորութեանը։ Կը քաջալերենք նաեւ ՀՕՄի մեր նուիրատու/հովանաւորները, որ անգամ մը եւս քաջալերեն մեզ եւ հովանաւորեն դաստիարակչական խիստ կարեւոր այս նախաձեռնութիւնը», երախտագիտութեամբ արտայայտուեցաւ ՀՕՄի Շրջանային Վարչութեան ատենապետուհի Ռեպեքա Պէրպէրեան։

Սեմինարը բաց է բոլորին, որուն մասնակցութեան սակը $25 է, ներառեալ ճաշը եւ գրադարանի համալիրի այցելութիւնը։

Ղեկավարներ պատրաստելու, ինչպէս նաեւ ՀՕՄը հանրութեան առաւել ծանօթացնելու հեռանկարով կազմակերպուած կարեւոր այս միօրեայ աշխատանքը, կ՚իրագործուի շնորհիւ ՀՕՄին հաւատացող հովանաւորներուն, որոնց իւրաքանչիւրի մասնակցութիւնը $1000 է։

Յաւելեալ մանրամասնութիւններու համար հաճեցէք դիմել ՀՕՄի Շրջանային Վարչութեան գրասենեակ, հեռաձայնելով (818) 500-1343 թիւին կամ [email protected] ե նամակի հասցէով:

***

ՀՕՄի ԱՄՆի Արեւմտեան շրջանը հիմնուած է 1984ին, իր կեդրոնատեղին ունենալով Քալիֆորնիոյ նահանգի Կլէնտէյլ քաղաքին մէջ: Ան 26 մասնաճիւղերով մարդասիրական կազմակերպութիւն մըն է, չորս նահանգներու մէջ գործող աւելի քան 1,200 անդամներով: Շրջանի ՀՕՄը ունի Ընկերային Ծառայութեան բաժանմունքը, հոգեբանական կեդրոնը եւ կը հովանաւորէ զանազան պատանեկան-երիտասարդական ծրագիրներ, կրթանպաստներ եւ այլ նպաստներ: Մանրամասնութիւններու համար հաճեցէք այցելել ՀՕՄի www.arswestusa.org կայքէջը կամ հեռաձայնեցէք (818) 500-1343 թիւին:

Post a comment