Blog

Շրջանի ՀՕՄի Մեծ Ընտանիքը Նորանոր Նուաճումներու Հաւատքով Դիմաւորեց Նոր Տարին

Կիրակի, 3 Յունուար 2016ի երեկոյեան, Կլէնտէյլի Ս. Աստուածածին եկեղեցւոյ Արմենակ Տէր Պետրոսեան սրահը, տեղի ունեցաւ ՀՕՄի Շրջանային Վարչութեան կազմակերպած աւանդական ամանորեայ ձեռնարկը, աւելի քան 300 ՀՕՄի անդամներու մասնակցութեամբ։ Նոր տարուան ուրախ եւ ոգեւորիչ մթնոլորտով իրականացող այս հաւաքը, իր ճոխ յայտագրով մեծ խանդավառութիւն ստեղծեց մասնակիցներուն մօտ եւ գեղեցիկ առիթ մը հանդիսացաւ հեռու եւ մօտիկ մասնաճիւղերուն իրարու հետ մօտէն առնչուելու։

Գեղեցիկ այս ձեռնարկին մասնակից դարձան Թեմիս առաջնորդ Մուշեղ արք. Մարտիրոսեանի ներկայացուցիչ Ս. Աստուածածին եկեղեցւոյ հովիւ Կոմիտաս քհնյ. Թորոսեան, ՀՕՄի Կեդրոնական Վարչութեան անդամներ Մարալ Մաթոսեան եւ Ռիթա Հինդլեան, ՀՕՄի մօտ ՀՅԴ Կեդր. Կոմիտէի կապ Կարօ Իսբէնճեան, ՀՄԸՄի Շրջանային Վարչութեան փոխ-ատենապետ Սագօ Կարապետեան, ՀՕՄի Կեդրոնական Վարչութեան նախկին ատենապետ Վիքի Մարաշլեան, Ս. Աստուածածին եկեղեցւոյ Հոգաբարձութեան ներկայացուցիչ անահիտ Զաքարեան, Eat and Feed բարեգործական ծրագրի կամաւոր ներկայացուցիչներ, Հայրենի ծանօթ Կիսաբաց Լուսամուտ մարդասիրական ծրագրի պատասխանատու Հրաչ Մուրատեան եւ բազմաթիւ հիւրեր։

Կոմիտաս քհնյ. Թորոսեանի սեղաններու օրհնութենէն ետք, ներկաները ողջունեց Շրջանային Վարչութեան ատենապետ  Ռեպեքա Պէրպէրեանը, որ առաջին հերթին շնորհաւորելով ներկաներու Նոր Տարին եւ Ս. ծնունդը, հպանցիկ ակնարկ մը նետեց ՀՕՄի անցնող տարուած գործունէութեան վրայ, որ կը յատկանշուէր Հայոց Ցեղասպանութեան 100ամեակով։ Ընկերուհին ընդգծեց նաեւ ՀՕՄի Ընկերային ծառայութեան եւ Հոգեբանական կեդրոններու զոհողութիւնները եւ յատուկ շնորհակալութիւն յայտնեց բոլոր անոնց, որոնք հաւատքով կը գործեն եւ յաջողութեան կ՚առաջնորդեն ՀՕՄի աշխատանքները։

Ժողովրդային եւ Ազգային երգերով երեկոն խանդավառեցին եւ բոլոր ներկաները պարի հանեցին սիրուած երգիչներ Գագիկ Բադալեան եւ Սալբի Մայիլեան, իսկ արցախցի Մարիամ Եւրեան, Արցախի Նուիրուած եւ ղարաբաղեան բարբառով իր իւրայատուկ մեներգներով ոչ միայն ոգեւորեց ներկաները, այլ նաեւ անոնց բարձր գնահատանքին արժանացաւ։

Ուրախալի այս երեկոն երկու գեղեցիկ երեւոյթներով կը յատկանշուէր։ Առաջինը, Շրջանային Վարչութիւնը բարձր գնահատեց ընթացաւարտ ՀՕՄի Կեդրոնական վարչութեան շրջանի անդամներ՝ ատենապետ Վիքի Մարաշլեանը, Անի Քէշիշեանն ու Ռոզի Պետրոսեանը։ Շրջանային Վարչութեան ատենապետ Ռեպեքա Պէրպէրեան, հպարտութեամբ ներկայացուց երեք ընկերուհիները եւ շրջանի ՀՕՄի մեծ ընտանիքի անունով երախտագիտութիւն յայտնեց ՀՕՄի ճամբով անոնց կատարած մարդասիրական բեղուն գործունէութեանց համար։ Կամքէ անկախ պատճառներով ընկերուհիներ Անի Քէշիշեան եւ Ռոզի Պետրոսեան բացակայ ըլլալով ձեռնարկէն, ընկհ. Պէրպէրեան բեմ հրաւիրեց ընկհ. Վիքի Մարաշլեանը եւ իւրայատուկ նուէրով մը գնահատեց զայն։ Ընկհ. Մարաշլեան շնորհակալութիւն յայտնեց իրենց ընծայուած երախտանքին համար եւ ըսաւ. «ՀՕՄին, հայ ժողովուրդին ու մեր հայրենիքին ծառայելը մեր բոլորի պարտականութիւնն է, որուն համար ակնկալութիւններ պէտք չէ ունենանք։ Իսկ այս գնահատանքը կ՚երթայ ՀՕՄի բոլոր այն անդամներուն, որոնց նուիրեալ գործունէութեան շնորհիւ է, որ մարդասիրական այս կազմակերպութիւնը իր ծառայութիւնները կը մատուցէ։ Կը շնորհաւորեմ բոլորիդ Նոր Տարին եւ Ս. Ծնունդը մաղթելով աշխարհին խաղաղութիւն եւ ՀՕՄի ծրագիրներուն յաջողութիւն»։

Երկրորդ գեղեցիկ երեւոյթը Eat and Feed բարեգործական ծրագրի պատասխանատուներու անակնալն էր։ Այս ծրագիրը ստեղծուած է երեք տարիներ առաջ, երկու մօտիկ ընկերներ՝ Ռոպերթ եւ Ալպեր Կիրակոսեաններու կողմէ։ Անոնք, խումբ մը կամաւոր օգնականներու օժանդակութեամբ, Դեկտեմբեր ամսուան շաբաթավերջերուն, ուտելիք վաճառելով, անոր եկամուտը կը նուիրեն բարեգործական կազմակերպութեան մը։ Այս տարի բախտը վիճակուած էր ՀՕՄին, որուն յանձնեցին ութ հազար տոլար արժողութեամբ վճարագիր մը, բարձր գնահատելով ՀՕՄի լայնածաւալ գործունէութիւնը։ Այս նախաձեռնութիւնը մեծապէս գնահատուեցաւ ներկաներուն կողմէ, որոնք ոգեւորիչ եւ երկարաշունչ ծափողջոյններով արժեւորեցին Կիրակոսեան ընկերներու այս քայլը։

Ընկհ. Պէրպէրեան, շնորհակալութիւն յայտնեց ծրագրի հեղինակներուն եւ առ ի գնահատանք իրենց մարդասիրական գործունէութեան ՀՕՄի Շրջանային Վարչութեան անունով յուշանուէրներ յանձնեց անոնց եւ խրախուսեց զանոնք շարունակելու բարեգործական իրենց այս ծրագիրը, օգտակար հանդիսանալով մարդկութեան ու հայ ժողովուրդին։

Ձեռնարկի հանդիսավարութիւնը կատարեց ՀՕՄի Շրջանային գրասենեակի ընդհ. տնօրէն Ժասիկ Ջառահեանը։ Ուրախ մթնոլորտը տիրապետող էր ամբողջ երեկոյեան ընթացքին։ Տարեց ու երիտասարդ ՀՕՄուհիները ուրախութեամբ պարեցին եւ հրճուանքով դիմաւորեցին ՀՕՄի նոր տարին ու Ս. Ծնունդին։ Ուշ երեկոյեան, անոնք ոգեւորութեամբ մեկնեցան տուն, ՀՕՄի առաքելութեան ու նպատակներու հետապնդման մէջ իրենց արդար բաժինը բերելու հաստատակամութեամբ։

Post a comment