Blog

A New ARS Chapter Established in San Jose Dedicated to Agnouni (in Armenian)

ՀՕՄի «Ակնունի» Նոր Մասնաճիւղ՝ Սեն Հոզէի Մէջ

3b44b5000d3ada04c028c395cd05cbfb_xsՇաբաթ, 12 Յունիս 2010ը յատկանշական օր մը եղաւ շրջանի ՀՕՄի մեծ ընտանիքին եւ յատկապէս Սեն Հոզէի հայկական գաղութին համար: Այդ օրը Հայ օգնութեան միութեան ԱՄՆի Արեւմտեան շրջանը հարստացաւ նոր մասնաճիւղով մը՝ փայլուն էջ մը եւս բանալով 100ամեայ մարդասիրական այս մեծ կազմակերպութեան հարուստ պատմութեան մէջ:

Մասնաճիւղի հիմնադիր ժողովը տեղի ունեցաւ Շաբաթ, 12 Յունիս 2010ին, մասնաճիւղի հիմնադրութեան իրենց գլխաւոր բաժինը բերած տէր եւ տիկ. Հայկ եւ Վերա Քամպուրեաններու բնակարանէն ներս:

Մասնաճիւղի հիմնադիր ժողովը սկիզբ առաւ ժամը 2ին, Շրջանային վարչութեան ատենապետուհի Սօսի Փօլատեանի բացման խօսքով, որուն մէջ ան իր գոհունակութիւնը յայտնեց նոր մասնաճիւղի հիմնադրութեան ուրախ առիթով եւ յոյս յայտնեց, որ ՀՕՄի 100ամեակի պատմական հանգրուանին ծնունդ առած երիտասարդ այս մասնաճիւղը, վստահութիւն ներշնչէ իր շրջապատին ու ՀՕՄի առաքելութեամբ առաջնորդուի իր գործունէութեան ընթացքին:

Առողջ մասնաճիւղ մը ունենալու իրաւական միջոցներուն ու զայն լաւապէս կազմակերպելու անհրաժեշտ աշխատանքներուն մասին կարեւոր տեղեկութիւններ փոխանցեցին Շրջ. վարչութենէն ժողովին ներկայ անդամներ՝ Մաքօ Սեդրակեան, Ռիթա Հինտլեան, Անի Կիրակոսեան, Աստղիկ Շիթիլեան, Յասմիկ Գոզանեան եւ Վիքի Քաթարոյեան:

Ժողովականները միաձայնութեամբ մասնաճիւղի անունը կնքեցին ՀՕՄի հիմնադիր Ակնունիի անունով: Ապա, մոմավառութեան խորհրդաւոր մթնոլորտի մը մէջ տեղի ունեցաւ հիմնադիր ժողովի գլխաւոր առանցքը հանդիսացող մասնաճիւղի առաջին երդման արարողութիւնը՝ կնքամայրութեամբ Սօսի Փօլատեանի: Տասներկու անդամ-անդամուհիներ, համոզուած ու ինքնավստահութեամբ ուխտեցին հաւատարիմ մնալ Հայ օգնութեան միութեան, իրագործելով անոր նպատակները եւ յարգելով անոր Ծրագիր-կանոնագիրի բոլոր կէտերը:

Տպաւորիչ այս արարողութենէն ետք, մասնաճիւղին յանձնուեցաւ ՀՕՄի ձեռագործուած դրօշը, որպէսզի ան հպարտութեամբ ծածանի նորաստեղծ մասնաճիւղի աշխատանքներու ընթացքին:

Շրջանային վարչութիւնը շնոհաւորելով նորագիրները՝ անոնց նուիրեց ՀՕՄի 100ամեակի խորհրդանիշը կրող գեղեցիկ յուշանուէրներ: Առ ի քաջալերանք, հիմնադիր ժողովին եւ երդման արարողութեան ներկայ գտնուեցան նաեւ ՀՕՄի Օքլընտի «Էրեբունի» եւ Սան Ֆերնանտօ հովիտի «Անահիտ» մասնաճիւղերու վարչութեանց ներկայացուցիչները:

Շնորհաւորական գրկախառնումներէ եւ բարեմաղթութիւններէ ետք, նոր ուխտեալ ՀՕՄի անդամ-անդամուհիները ընտրեցին իրենց անդրանիկ վարչութիւնը, որն իր հերթին ընտրեց իր դիւանը.

Վերա Քամպուրեան՝ ատենապետ
Պեթի Մոմճեան՝ փոխատենապետ
Ալենոյշ Յովասափեան՝ քարտուղար
Ռինա Չանչանեան՝ գանձապահ
Լեռնիկ Յովասափեան՝ հաշուապահ
Յայտնենք, թէ ՀՕՄի մասնաճիւղ մը հիմնելու պահանջքը տարիներէ ի վեր գոյութիւն ունէր Սեն Հոզէի շրջանին մէջ: Բաւական ուսումնասիրութիւններէ եւ ՀՕՄի մասնաճիւղ մը բանալու ներկայացուած դիմումները քննելէ ետք, 8 Մայիս 2010ին այդ գծով նախաքայլեր առնուած էին: Նոյն օրը, Շրջանային վարչութիւնը ընդառաջելով խումբ մը հայորդիներու հաւաքական դիմումին՝ չորս ընկերուհիներով այցելեց շրջանը եւ հանդիպումի մը ընթացքին բացատրեց ՀՕՄի առաքելութիւնը, կառոյցն ու հետապնդած ազգային ու մարդասիրական նպատակները: Ապա ցուցադրուեցաւ ՀՕՄի աշխատանքները արտացոլող տեսաերիզ մը եւ յանձնուեցաւ ՀՕՄի կանոնագիրը:

«Շրջանային վարչութիւնը համոզուած է, որ երիտասարդ անհատներէ կազմուած նորաստեղծ այս մասնաճիւղը առաւելագոյնը պիտի տայ իր ժողովուրդին ու շրջապատին՝ միշտ հաւատարիմ մնալով ՀՕՄի առաքելութեան եւ հետապնդած նպատակներուն», մասնաճիւղի հիմնադրութենէն ետք յայտարարեց ընկերուհի Փօլատեան:

Կը շնորհաւորենք ՀՕՄի Սեն Հոզէի «Ակնունի» մասնաճիւղը, այն ակնկալութեամբ, որ ան իր բեղուն եւ ազգօգուտ գործունէութեամբ պիտի ծառայէ իր ազգին՝ բարի օրինակ դառնալով իր շրջապատին:

ՄԱՐՕ ՔԷՇԻՇԵԱՆ

Post a comment