Blog

ARS 90th Regional Convention Is Held in Fresno for the ARS Centennial (in Armenian)

ՀՕՄի 90րդ Պատգամաւորական Ժողովը Կ՛աւարտէ Իր Աշխատանքները

b7e607e23f1646b9ce9f7d0da4fbe580_xsՖՐԵԶՆՕ.- Հայ Օգնութեան Միութեան Արեւմտեան Ամերիկայի շրջանի 90րդ պատգամաւորական ժողովը տեղի ունեցաւ 15-18 Յուլիսին, Ֆրեզնոյի «Ռատիսըն» պանդոկի սրահէն ներս: Ժողովին հանդիսաւոր բացումը տեղի ունեցած էր Ս. Երրորդութիւն եկեղեցւոյ սրահին մէջ, որմէ ետք ժողովականները հաւաքուեցան պանդոկ եւ լսեցին ՀՕՄի շրջանային վարչութեան ատենապետուհի Սօսի Փօլատեանի կարգահրաւէրը:

Առաջին հերթին, ժողովի դիւան ընտրուեցան ատենապետուհիներ Լենա Պոզոյեան (հայերէնի) եւ Անժելա Սաւոյեան (անգլերէնի), ատենադպրուհիներ Մարալ Փօլատեան (հայերէնի) եւ Քարմէն Լիպարիտեան (անգլերէնի): Իրաւասութիւնները ճշդող յանձնախումբի զեկոյցէն ետք, Անահիտ Աճունեան ընտրուեցաւ հայերէնի յաւելեալ ատենադպրուհի եւ Վիքթորիա Մարգարեանը՝ անգլերէնի յաւելեալ ատենադպրուհի: Ժողովի չորս օրերուն ընթացքին, ամէնէն դժուարին պարտականութիւնը դիւանինն էր. ան փորձեց ժողովը պահել իր հունին մէջ եւ մինչեւ ուշ ատեն շարունակեց ատենագրութիւններ արձանագրել: Ժողովի ձգտումները բանաձեւերու միջոցով բիւրեղացնելու պարտականութիւնը ինկաւ Ճուտի Ճինկիրեանի, Խաթուն Բագրատունիի եւ Քրիստին Քէշիշեանի ուսերուն՝ իբրեւ բանաձեւի յանձնախումբ:

Ժողովը քննարկեց ու բարձրօրէն գնահատեց շրջանային վարչութեան, անձնակազմին, ներառեալ՝ ընկերային ծառայութեան ու հոգեբանական կեդրոններու, աշխատանքները անցնող տարեշրջանին ընթացքին, հակառակ տիրող տնտեսական ճգնաժամին:

Ժողովականներուն ներկայացուեցաւ անցնող տարեշրջանին տարուած ռազմավարական ծրագրումի աշխատանքի արդիւնքը՝ Նայիրի Տէրտէրեանի եւ Մարալ Փօլատեանի կողմէ: Ծրագրի ութ կէտերու՝ երիտասարդներու ներգրաւումի, մասնաճիւղերու գրասենեակային դրութեան եւ շրջաններու ծառայութիւններու, դաստիարակչական, կազմակերպչական, տնտեսական հաւասարակշռուած մօտեցումի, եւ հանրային արշաւի երկարամեայ ծրագրային մօտեցումի, թղթածրարը ընդունուեցաւ: Անոր վրայ աւելցան մասնաճիւղերու աշխուժացման, անդամներու ֆիզիքական եւ առողջապահական պահանջներուն, ինչպէս նաեւ վարչական ու ղեկավարական գիտելիքներու փոխանցման թելադրանքներ: Ժողովը նաեւ ընդունեց ընտանեկան բռնութեան զոհերու օգնութեան հիմնադրամի ստեղծումը եւ շրջանի տնտեսական ու յարաբերական յառաջդիմութեան համար կարգ մը թելադրանքներ:

Ժողովը լսեց ՀՕՄի կեդրոնական վարչութեան տեղեկագիրը՝ ներկայացուած ֆրեզնոյաբնակ Ռոզի Պետրոսեանի կողմէ:

Ժողովականները, հիւրերը եւ դէտերը, մտահոգուած Հայաստանի Ախուրեան քաղաքին մէջ գործող ՀՕՄի «Մօր ու մանկան» ծննդատան դիմագրաւուած տնտեսական դժուարութիւններով՝ ընդառաջեցին շրջանային վարչութեան թելադրանքին անմիջապէս սկսելու համար հանգանակային արշաւի մը եւ 24 ժամուան ընթացքին ընկերուհիները հանգանակած էին աւելի քան 11 հազար տոլար. առաւել, 4 մասնաճիւղեր որոշած էին հանգանակային ձեռնարկներ կազմակերպել, ի նպաստ կեդրոնին: Ժողովի դիւանը յայտարարեց, որ թէեւ խօսելու ցանկերը մերթ ընդ մերթ կը փակուէին, հովանաւորութեան ցանկը պիտի չփակուէր:

Ջաւախքի տնտեսական ու ազգային ճգնաժամին նկատմամբ ժողովը անտարբեր չէր: Ջաւախքահայութեան օգնութեան համար ալ յատուկ բանաձեւ ընդունուեցաւ:
Պատգամաւորական ժողովին աւարտին, վաւերացուեցաւ նախահաշիւը, որ ներկայացուած էր ընդհանուր տնօրէն Ժասիկ Ջառահեանի կողմէ, եւ ընտրուեցան Գարմէն Լիպարիտեան, Նայիրի Տէրտէրեան, Քրիսթին Քէշիշեան եւ Սեդա Յակոբեան, իբրեւ շրջանային վարչութեան լրացուցիչ անդամներ:

Սօսի Փօլատեան, Աստղիկ Շիթիլեան եւ Անի Կիրկոսեան (Մաքօ Սեդրակեանը քաղաքէն դուրս կը գտնուէր), որոնք աւարտած էին իրենց շրջանային վարչութեան պաշտօնավարութեան 2 տարուան շրջանը, մնացող վարչականներէն՝ Արուս Մելքոնեանին ձեռամբ ստացան գնահատագիրներ: Մնացեալ վարչականներու եւ պատգամաւորներու սիրալիր արտայայտութիւններէն ետք, ժողովը իր աւարտին հասաւ ՀՕՄի քայլերգի երգեցողութեամբ:

Նոյն երեկոյեան, 2010-2011 տարեշրջանի շրջանային վարչութիւնը իր առաջին նիստին ընթացքին, որ հրաւիրուած էր պատգամաւորական ժողովի դիւանին կողմէ եւ կեդրոնական վարչութեան ներկայացուցիչ Ռոզի Պետրոսեանի ներկայութեամբ, ընտրեց իր դիւանը՝ հետեւեալ կազմով.

Ատենապետուհի՝ Արուսեակ Մելքոնեան,
Փոխատենապետուհի՝ Նայիրի Տէրտէրեան,
Ատենադպրուհի՝ Ռիթա Հինդլեան,
Գանձապահուհի՝ Քրիստին Քէշիշեան,
Խորհրդականներ՝ Սոնա Մատարեան, Յասմիկ Գոզանեան, Վիքի Քաթարոյեան, Սեդա Յակոբեան եւ Քարմէն Լիպարիտեան:

Ապա ժողովականները վերադարձան իրենց շրջանները՝ Ֆրեզնոյէն Սան Ֆրանսիսքօ եւ Լոս Անճելըսէն Օրենճ Քաունթի:

ԸՆԿԵՐԱՅԻՆ ԾՐԱԳԻՐՆԵՐ ԵՒ ՏՕՆԱԽՄԲՈՒԹԻՒՆՆԵՐ

Պատգամաւորական ժողովի հիւրընկալութիւնը ստանձնած էր Ֆրեզնոյի «Մայր» եւ «Սոֆիա», Սան Ֆրանսիսքոյի «Կարին» եւ Օքլենտի «Էրեբունի» մասնաճիւղերէն 45 ընկերուհիներէ կազմուած յանձնախումբ մը՝ գլխաւորութեամբ դատաւոր Հուրի Ալանճեան-Սանտըրսընի, որ յատուկ ձեւով յիշատակեց յանձնախումբի աշխատանքներուն Նազիկ Արիսեանի ներդրումը: Բոլոր ընկերական ծրագիրները տեղի ունեցան պանդոկին դիմացը գտնուող Ս. Երրորդութիւն եկեղեցւոյ սրահին մէջ: Առաջին օրուան՝ Յուլիս 15ի, ճաշը նուիրուած էր Ֆրեզնոյի «Մայր» մասնաճիւղի 95ամեակին: Երեկոյեան, տեղի ունեցաւ ծանօթացման ընթրիք:

Երկրորդ օրուան երեկոյեան տեղի ունեցաւ երգիծական երեկոյ՝ մասնակցութեամբ Վարսի Ներսէսեանի: Երրորդ օրը, որ Շաբաթ, 17 Յուլիսն էր, գաղութի անդամներուն հետ ճաշկերոյթ-պարահանդէս մը կազմակերպուած էր: Ձեռնարկի հանդիսավարն էր հիւրընկալ յանձնախումբի ատենապետուհին, որ հրաւիրեց Վահան քհնյ. Կոստանեանը բացման աղօթքի, եւ Շողակաթ Բաբոյեանը՝ ՀՕՄի քայլերգը մեներգելու, դաշնակի ընկերակցութեամբ Աստղիկ Գէորգեանի:

Ընթրիքի աւարտին, Սանտըրսըն հրաւիրեց կազամակերպիչ յանձնախումբի չորս մասնաճիւղերու ատենապետուհիները՝ Պարպարա Սիքուէրա («Մայր»), Անժել Օհաննէսեան («Սոֆիա»), Հուրիկ Այնթապլեան («Կարին») եւ Նելլի Ազիզեան («Էրեբունի»), որոնցմէ Սիքուէրա բոլորին անունով բարի գալուստ մաղթեց: Ապա շրջանային վարչութեան ատենապետուհի Սօսի Փոլատեան Սիքուէրային յանձնեց «Մայր» մասնաճիւղի 95ամեակին առիթով յուշատախտակ մը:

Փօլատեան իր խօսքին մէջ նշեց, թէ ՀՕՄի 90րդ շրջանային պատգամաւորական ժողովին առիթով Ֆրեզնօ հաւաքուած՝ «կը տօնենք մեր միութեան 100ամեակն ու «Մայր» մասնաճիւղի 95ամեակը, այն քաղաքին մէջ, ուր հիմը դրուեցաւ մեր առաջին մասնաճիւղին»: Ան «վարձքը կատար» ըսաւ ընկերուհիներուն նուիրական աշխատանքին համար, դիտել տալով, թէ արեւմտեան շրջանը կը շարունակէ պահել այն արժէքները, որոնք փոխանցուած են նախորդ սերունդներէն, եւ կը մշակէ այնպիսի ծրագիրներ, որոնցմով մեր միութիւնը արդի ժամանակներուն եւ միջոցներուն հետ քայլ կը պահէ: Ապա աւելցուց. «Պարոյր Սեւակի բառերով, ՀՕՄի համար կրնանք ըսել. «Հների մէջ՝ դու ալեհեր, Նորերի մէջ՝ նոր ու ջահել»: Ե՛ւ ալեհեր, ե՛ւ ջահել մասնաճիւղերով այս շրջանը անցեալ ամիս Սան Հոզէի մէջ «Ակնունի» մասնաճիւղը հիմնելով՝ ամէնէն երիտասարդ խումբը աւելցուց իր շարքերուն: ՀՕՄի այլ ցամաքամասերէն եկող արձագանգները Արժանթինէն, Աւստրալիայէն եւ Գանատայէն մեզի ցոյց տուին, որ մեր ուրախութիւնը կը բաժնեն նաեւ մեր աշխարհացրիւ բոլոր ընկերուհիները»:

Ապա, դատաւոր Սանտըրսըս ՀՕՄի անդամներուն թելադրեց վերյիշել իրենց երդումը, իրենց անձնական կամքով ընդունած յանձնառութիւնը եւ աւելցուց, որ աշխատանքի օրը այսօր է:
Կեդրոնական վարչութեան ներկայացուցիչ Ռոզի Պետրոսեան շնորհաւորեց ՀՕՄի 100ամեակը եւ յիշեց Ջաւախքի, Արցախի եւ Հայաստանի երկրաշարժի գօտիի ժողովուրդին դիմագրաւած դժուարին պայմանները, մանաւանդ ՀՕՄի «Մօր ու Մանկան» ծննդատան դժուարութիւնները, եւ խնդրեց, որ ներկաները իրենց սրտերը բանան եւ օգնութեան ձեռք երկարեն:

Կեդրոնական կոմիտէի ներկայացուցիչ Յովան Թաշճեան իր ակնածանքը արտայայտեց՝ ըսելով, որ կը խոնարհի բոլոր ՀՕՄի անդամներուն դիմաց, սկսեալ 1910 թուականէն եւ դիտել տուաւ, թէ ՀՕՄի անդամ ըլլալը իմաստ կու տայ ու կը հարստացնէ մեր կեանքը՝ ծառայութեամբ: Ապա, կոչ ուղղեց բոլորին, որ ՀՕՄին նային յարգանքով եւ փորձեն իրենց տեղը գտնել ՀՕՄի աշխատանքներուն մէջ: Եւ իբրեւ փաստ, որ լիովին կը հաւատայ ՀՕՄէն ներս նոր ուժեր ներգրաւելու ծրագիրին՝ ընկեր Թաշճեանը յայտարարեց, թէ անձնապէս ՀՕՄի դիմումնագիր ներկայացուցած է:

Դատաւոր Սանտըրսըն առիթը օգտագործեց խնդրելու, որ բոլոր այր մարդիկ, որոնք իրենց ՀՕՄուհի կիներուն, քոյրերուն եւ մայրերուն օգնած են, ոտքի կանգնին: Ձեռնարկին աւարտին, տեղի ունեցաւ մոմավառութիւն՝ ի յիշատակ կամ ի պատիւ ՀՕՄուհիներու, ապա ՀՕՄի կեդրոնական եւ շրջանային վարչութեան ընկերուհիները, Խաչիկ Հաւաթեանի եւ ձեռնարկի հիւրընկալ ամոլին՝ Կարօ եւ Ալիս Կիւրեղեաններու, հետ վառեցին ՀՕՄի 100ամեակի կարկանդակի մոմերը: Կարօ Կիւրեղեանի 80րդ տարեդարձին առթիւ երգելէ ետք, ձեռնարկի պարահանդէսի բաժինը շարունակուեցաւ ուրախ մթնոլորտի մը մէջ՝ մասնակցութեամբ Խաչիկ Ճինկիրեանի:

Փօլատեան իր պատգամը աւարտեց հետեւեալ խօսքերով. «Այնքան ատեն, որ մեր ադամ-անդամուհիները կը շարունակեն միտքերու առողջ փոխանակումով ՀՕՄի նպատակաները իրագործելու լաւագոյն լուծումները գտնել, այնքան ատեն, որ ձեռք-ձեռքի տուած նուիրումով կը ծառայեն մեր ժողովուրդի պէտքերը հոգալու, այնքան ատեն, որ մեր ժողովուրդը կը գոյատեւէ, ՀՕՄը եւս պիտի շարունակէ իր նուիրական աշխատանքը»:

ՌԻԹԱ ՀԻՆԴԼԵԱՆ Rita Hintlian, Convention Reporter

Post a comment