Blog

ARS Central Executive Presents ARS Centennial Book to Ashkhen Pilavjian (in Armenian)

Կեդր. Վարչութիւնը ՀՕՄի 100ամեայ Պատմութեան Հատորը Նուիրեց Ընկհ. Աշխէն Փիլաւճեանին

4739b6c64144f72975550c5e8df1b948_xsՇաբաթ, 16 Յուլիս 2011ի երեկոյեան, Սանթա Մոնիքայի «Շերիթըն Տելֆինա» պանդոկի սրահին մէջ, իր յաջող աւարտին հասաւ ՀՕՄի ԱՄՆի Արեւմտեան շրջանի 91րդ Շրջանային պատգամաւորական ժողովը:

Եռօրեայ արդիւնաւէտ այս ժողովէն ետք, բոլոր ժողովականները ՀՕՄի «Կարս» մասնաճիւղի կողմէ հրաւիրուեցան ծանօթ բարերարուհի եւ ՀՕՄի «Կարս» մասնաճիւղի անդամ Աշխէն Փիլաւճեանի բնակարանը, ուր ընթրիքի հիւրը եղան սիրելի բարերարուհիին:

Տան մուտքին, Ա. Փիլաւճեան ժպտադէմ դիմաւորեց հիւրերը, բարի գալուստի քաղցր խօսքերուն առընթեր՝ իւրաքանչիւրին ծաղիկ մը նուիրելով: Նորընտիր շրջանային վարչութեան եւ պատգամաւոր ընկերուհիներէն բացի, ճաշկերոյթին իրենց մասնակցութիւնը բերին նաեւ Կեդր. վարչութեան ատենապետուհի Վիքի Մարաշլեան եւ յատկապէս պատգամաւորական ժողովի համար շրջանը գտնուող Կեդր. վարչութեան անդամ Միրիէլ Բարսեղեան:

ՀՕՄի «Կարս» մասնաճիւղի անունով ներկաներուն բարի գալուստ մաղթեց ատենապետուհի Հելկա Սարգիս, որ միաժամանակ նաեւ շնորհակալութիւն յայտնեց պատգամաւոր ՀՕՄուհիներուն, որոնք եռօրեայ ժողովներէն ետք, իրենց յոգնութիւնը անտեսելով՝ ընդառաջած էին իրենց հրաւէրին: Ան նաեւ իր մասնաճիւղին երախտագիտութիւնը փոխանցեց Ա. Փիլաւճեանին, որ ոչ միայն հիւրընկալած էր ներկաները, այլ նաեւ սիրայօժար ընդունած էր ճաշկերոյթին հովանաւորութիւնը:

Հայկական մեղեդիներու կենդանի նուագակցութեամբ ՀՕՄուհիները ճաշակեցին հրամցուած համադամ ճաշերը: Ապա, Կեդր. վարչութեան անունով ելոյթ ունեցաւ ատենապետուհի Վիքի Մարաշլեան, որ առիթը պատեհ նկատելով՝ Աշխէն Փիլաւճեանին պաշտօնապէս նուիրեց ՀՕՄի Կեդր. վարչութեան հրատարակած ՀՕՄի 100ամեայ պատմութեան հատորը, որուն մեկենասութիւնը սիրայօժար ստանձնած էր ինք՝ ընկերուհի Փիլաւճեանը:

Վիքի Մարաշլեան յստակացուց նաեւ, թէ «Հայաստան-Արցախ կատարուած ՀՕՄի 100ամեակին նուիրուած ձեռնարկներու շարքին, ՀՕՄի 100ամեայ պատմութիւնը ընդգրկող այս հատորին շնորհահանդէսը, Հոկտեմբեր 2010ին արդէն իսկ կատարուած էր: Դժբախտաբար սակայն, ընկերուհի Փիլաւճեան չկարենալով ներկայ գտնուիլ անոր՝ վարչութիւնս այսօր յարմար գտաւ իր շնորհակալութիւնը յայտնելու եւ հատորէն օրինակ մը յանձնելու իրեն»:

Այնուհետեւ, Վ. Մարաշլեան ընթերցեց Աշխէն Փիլաւճեանի կենսագրականը, որ հրատարակուած էր հատորին մէջ, եւ զոր կը ներկայացնենք ամբողջութեամբ.

«Տիկ. Աշխէն Փիլաւճեան այն կիներէն է, որոնք սիրայօժար կը ծառայեն իրենց ժողովուրդին: Տիկ. Փիլաւճեանի ուսերուն առաջ նիւթաբարոյական ծառայութիւնները այնքան լայն ու բազմապիսի են, որ ան արդարօրէն արժանացած է «բարերարուհի» կոչումին եւ ան կը շարունակէ իր ամուսնոյն՝ հանգուցեալ Ալեքսան Փիլաւճեանի հետ, սկսած ազգանպաստ առաքելութիւնը:

Տիկ. Աշխէն ծնած է Հալէպ, Սուրիա, գաղթականութեան մութ ճամբաներէն անցած ընտանիքի մը մէջ: Շրջանաւարտ է նոյն քաղաքի «Կիլիկեան» վարժարանէն, ապա յաճախած է «Ժան տÿԱրք» դպրոցը՝ նոյն ատեն հետեւելով դաշնամուրի դասընթացքներու:

Ուսման աւարտին, կը դասաւանդէ «Կրթասիրաց» վարժարանին մէջ: 1955ին կ՛ամուսնանայ ՀՄԸՄի ոտնագնդակի աստղ Ալեքսան Փիլաւճեանի հետ եւ կը դառնայ մայր երկու զաւակներու՝ Վահրիճի եւ Բեգլարի: 1968ին ընտանեօք կը փոխադրուի Պէյրութ, Լիբանան:

Քաղաքացիական պատերազմը տեղահան կ՛ընէ Փիլաւճեան ընտանիքը, որ կը հաստատուի Քալիֆորնիոյ Սանթա Մոնիքա քաղաքը, ուր եւ մեծ յաջողութեամբ կը պսակուի գործակիցներու հետ իրենց հիմնած St. Vincent Jewelry Center գոհարավաճառատունը, որ առիթ կ՛ընծայէ Ա. Փիլաւճեանին, գթառատ նուիրաբերումով նիւթապէս սատարելու գաղութի կարիքներուն՝ իրաւացիօրէն արժանանալով իր «Բարերարուհի» կոչումին»:

Հատորի յանձնումէն ետք, հաճելի մթնոլորտի մը մէջ շարունակուեցաւ ճաշկերոյթը: Ներկաները առանձնաբար իրենց շնորհաւորանքները փոխանցեցին եւ յիշատակի նկարներ առին Աշխէն Փիլաւճեանի հետ: Ուշ գիշերին, ՀՕՄուհիները մեկնեցան տուն, երեկոն վայելած եւ եռօրեայ Պատգամաւորական ժողովին իրենց օգտակար ներդրումը բերած ըլլալու գոհունակութեամբ:

ՄԱՐՕ ՔԷՇԻՇԵԱՆ

Post a comment