Blog

ARS Erepouni Chapter Celebrates 15th Anniversary of the Armenian Day School in Walnut Creek

armenia, armenian relief society, non profit, non profit organization, los angeles,ՀՕՄի «Էրեբունի» Մասնաճիւղի Ուրբաթօրեայ Դպրոցի Ամավերջի Հանդէսը
Օքլէնտի ՀՕՄի «Էրեբունի» մասնաճիւղի ուրբաթօրեայ դպրոցը այս տարի բոլորեց իր 15ամեակը, շքեղ հանդիսութեամբ ու ճոխ յայտագրով մը: Հանդիսութիւնը տեղի ունեցաւ Ուրբաթ, Մայիս 16ին, երեկոյան ժամը 6:30ին, Walnut Creek քաղաքի «Trinity Lutheran» եկեղեցւոյ մէջ:

Հանդէսը սկսաւ աշակերտներու մուտքով ու Հ.Մ.Ը.Մ.ի «Կարս» մասնաճիւղի արի-արենոյշներու դրօշակի արարողութեամբ՝ ընկերակցութեամբ ամերիկեան, հայկական ու դպրոցի քայլերգներով:

Հանդիսութեան բացումը կատարեց եւ յայտագիրը վարեց դպրոցի ուսուցչուհիներէն Կարինէ Մէրկէրեան: Բարի գալուստի խօսքերով ելոյթ ունեցաւ վարժարանի տնօրէնուհի Նորա Շիրիքեան: Ան իր խօսքը ուղղելով ներկաներուն ըսաւ. «Ինծի համար բացառիկ հաճոյք է ողջունել ձեր ներկայութիւնը այս երեկոյ, ՀՕՄի «Էրեբունի» մասնաճիւղի միօրեայ վարժարանի 15ամեակին նուիրուած հանդիսութեան: Մեր ոսկեղէնիկ լեզուն, դարեր շարունակ, կոփած է մեր ազգային նկարագիրը, երաշխաւորելով մեր ժողովուրդին գոյատեւումը. այս առիթով երախտագիտական զգացումներս կ’ուզեմ փոխանցել 15 տարի առաջ, այս դպրոցի հիմնադրին՝ Լուսին Իսրայէլեանին ու իր գործակիցներուն, որ 1993ին ունեցան տեսիլքը՝ թռիչք տալու յոյժ կարեւոր առաքելութեան մը, որուն պտուղները կը քաղենք մենք այսօր: 1993էն ի վեր մեր վարժարանը կը վայելէ ՀՕՄի հովանաւորութիւնը ու անոր անմիջական քաջալերանքը, եւ այս ուրախ առիթով կ’ուզեմ իմ շնորհակալութիւնս յայտնել ՀՕՄին, մեր նուիրեալ կամաւոր ուսուցչուհիներուն եւ ծնողներուն, իրենց կատարած գնահատելի աշխատանքներուն համար: Շնորհիւ այս համագործակցութեան, մենք վստահօրէն պիտի շարունակենք այս վեհ առաքելութիւնը՝ պատրաստելով առողջ սերունդ մը, որ հպարտ պիտի ըլլայ իր դարաւոր արժէքներուն, ամրացնելով իրենց մէջ սէրը հանդէպ մեր գողտրիկ լեզուին ու հարուստ մշակոյթին»:

Հանդիսութիւնը շարունակուեցաւ աշակերտներուն կողմէ պատրաստուած արտասանութիւններով, երգերով, պարերով ու ներկայացումներով. բոլոր դասարանները կարգով ներկայացուցին իրենց անուշիկ լեզուով արտասանութիւններ, նուիրուած հայ լեզուին, հայ մայրերուն, Հայաստանին ու հայ եկեղեցւոյ, ինչպէս նաեւ վերի դասարանի աշակերտները ներկայացուցին հայկական պարեր իրենց նոր տարազներով: Հանդէսի վերջաւորութեան աշակերտները կատարեցին հայկական խմբերգեր՝ ղեկավարութեամբ Ագնէս Աւոյեանի:

ՀՕՄի Արեւմտեան Ամերիկայի Շրջանային վարչութեան պատգամը փոխանցեց Շրջանայինի ատենապետուհի Սօնիա Փէլթէքեան: Ան նախ բարի գալուստ մաղթեց ներկաներուն ու շնորհաւորեց միօրեայ դպրոցի 15ամեակը, ապա ան շարունակեց ըսելով. «Շնորհակալութիւն կը յայտնեմ, անցեալի ու ներկայի բոլոր անդամներուն, որոնք հիմը դրին այս դպրոցին. նաեւ կը գնահատեմ բոլոր ծնողները իրենց նուիրումին ու ծանր աշխատանքին համար, որ կը պահեն այս միօրեայ դպրոցը. այս յուզիչ առիթով չէմ կրնար չյիշատակել ջարդի ենթարկուած մեր հայ մայրերը, որոնք անապատի տաք աւազին վրայ կը սորվեցնէին Այբ ու Բենը իրենց զաւակներուն. մեր միօրեայ դպրոցները տուած են հոյակապ արդիւնքներ, մեր աշակերտները հոն սորված են գրել, կարդալ, երգ ու պար: Այսպիսով անոնք հպարտ կը զգան իրենց պատմութեամբ ու տակաւին այս բարիքներու կողքին կը ծանօթանան ուրիշ հայ պատանիներու, որոնց հետ կը հաստատեն բարեկամութիւն իրենց ամբողջ կեանքի ընթացքին»:

Ապա Սօնիա Փէլթէքեան, իր խօսքը մասնաւորելով, ՀՕՄին ըսաւ. «2010ին պիտի տօնենք ՀՕՄին 100ամեակը, 100 տարուայ ծառայութիւն հայ գաղութներուն աշխարհի մէջ. ձեր առատաձեռն նուիրատուութիւններով կ’օգնենք մեր քոյրերուն ու եղբայրներուն Լիբանանի, Հայաստանի, Արցախի ու Չաւախքի մէջ եւ ուր որ պէտք է. անցնող 100 տարուան ընթացքին, անաչառօրէն աշխատեցանք հայ ժողովուրդին հետ, հայ ժողովուրդին համար. մեր կարգախօսն է «Ժողովուրդիս հետ ժողովուրդիս համար». մենք պիտի ծառայենք 100 տարի եւս, երբ որ պէտք է, մենք պիտի ըլլանք հոն»:

Հանդէսի վերջաւորութեան պարգեւատրուեցան բոլոր ուսուցչուհիները, որոնք երկար տարիներ նուիրումով ծառայած են դպրոցին՝ հաւատալով անոր առաքելութեան. նաեւ պարգեւատրուեցան նախկին 4 աշակերտներ որոնք այժմ կը յաճախէն UC Berkeley, որոնք ծառայած են այս տարի որպէս ուսուցիչ, ապա ներկայացուեցաւ 15 մոմերով 15ամեակի կարկանդակը:

Փակման խօսքը կատարեց ՀՕՄի «Էրեբունի» մասնաճիւղի ատենապետուհի Յասմիկ Գոզանեան. ան գնահատական ու շնորհակալական խօսքերէ ետք հրաւիրեց ներկաները ճաշկերոյթի, որ մասնաւորաբար պատրաստուած էր առ ի գնահատանք աշակերտներուն ու ծնողներուն. ճաշկերոյթի ընթացքին ցուցադրուեցաւ դպրոցին 15 յիշատակելի ամեակներէն հատուածներ ներկայացնող տեսաերիզ մը:

Post a comment