Blog

ARS Saturday School Students’ Cultural Performance to Commemorate the Armenian Genocide (in Armenian)

Հայոց Ցեղասպանութեան 100-ամեակի Շեմին ՀՕՄի Շաբաթօրեայ Վարժարաններու Յուշահանդէս

Հայ Օգնութեան Միութեան (ՀՕՄ) Հայեցի դաստիարակութեան առաքելութիւնը կը պանծար՝ Ապրիլ 12, 2014ի առաւօտեան, Քալիֆորնիոյ Հայ Երիտասարդաց Միութեան սրահէն ներս, ուր ՀՕՄի շաբաթօրեայ վարժարան յաճախող աշակերտներ իրենց ուսուցիչներով, պատասխանատուներով, ծնողներով եւ հարազատներով եկած էին՝ Հայոց Ցեղասպանութեան 100-ամեակի շեմին, արուեստի ճամբով արտայայտելու հայավայել իրենց բողոքն ու պահանջատիրութիւնը Հայ Դատի պաշտպանութեան ու հատուցման ի խնդիր:

Արեւմտեան ԱՄՆի Շրջանային Վարչութեան ՀՕՄի՝ Շաբաթօրեայ Վարժարաններու Խնամակալ Մարմինը ծրագրած էր վերոյիշեալ յուշ-հանդիսութիւնը հրաւիրելով կազմակերպութեան հովանիին տակ գործող բոլոր Շաբաթօրեայ վարժարանները իրենց մասնակցութիւնը բերելու հայ մշակոյթի գեղարուեստական յայտագրին նուիրուած Ցեղասպանութեան ոգեկոչման:

Քաջալերելու ու վայելելու համար հայ հոգիի ու ոգիի հարստութեամբ ու հպարտութեամբ լի, յոտնկայս խանդավառ ծափողջոյններով դիմաւորուած, մեր ժողովուրդն ու գեղարուեստը միօրեայ վարժարաններու ներկայացնող պարման-պարմանուհիներու ինքնավստահ եւ սրտերը յուզող ներկայացումին ներկայ էին նաեւ մեծ թիւով ՀՕՄուհիներ եւ ՀՕՄի բարեկամներ:

Խնամակալ Մարմնի անդամներէն՝ Փառքուհի Խաչիկեան բարի գալուստի իր խօսքէն ետք, անդրադարձաւ Ապրիլեան հրամայականէն բխած գեղարուեստական այս հանդիսութեան իրագործման, որ պիտի ապրեցնէ ստեղծագործ հայ մշակոյթի ռահվիրաները շաբաթօրեայ մեր աշակերտներու կատարողութեամբ:

Խնամակալ Մարմնի ատենապետուհի՝ Սոնա Մատարեան բարձրօրէն գնահատեց ՀՕՄի սրբազան առաքելութեան հետ առընչուող՝ հայ ծնողքին եւ հայ մանկավարժին միասնական նուիրումն ու դերը ի դէպ մեր գուրգուրանքին վստահուած մատղաշ սերունդի առողջ ու հայեցի դաստիարակութեան մեծագոյն դերին: Իր խօսքին մէջ Մատարեան մէջբերեց, թէ «Ապրիլ 24 կը նշանակէ՝ օրը 24 ժամ ապրիլ ու գործել հայօրէն, քաջ գիտակցութեամբ շարունակել տակաւ անպատասխան մնացած մեր դատի պահանջատիրութեան հետապնդումը, որուն արդար յետնորդներն ենք եւ պիտի գայ այն օրը երբ մարդկային արդարութիւնը պիտի շողայ մեր ճակտին…»:

Յաջորդաբար ելոյթ ունեցան ՀՕՄի Շաբաթօրեայ՝ Մեղրի, Սեւան, Սիփան, Անահիտ, Սօսէ եւ Մայր մասնաճիւղերու հովանիին տակ գործող վարժարաններու աշակերտներ այլազան խմբային ու անհատական կատարումներով. ասմունք, երգ ու խօսք. ներկաները անմարմին շունչը կը զգային հայ խօսքի վարպետներուն՝ Նարեկացիի, Ներսէս Շնորհալիի, Խրիմեան Հայրիկի, Կոմիտասի, Սայաթ Նովայի, Շիրազի, Սեւակի, Գէորգ Էմինի. աշակերտները ապրեցան ու ապրեցուցին՝ Հայոց Ոսկեղնիկը, Աղօթքը, Ափ մը Մոխիրը, Կռունկը, Հայրենի Երկիրն ու Հայ Լինելն ու Լինելու Կամքը… Ի վերջոյ, «Պարէ՛ Սասուն, պարէ՛… Արարատի լանջին պարե՛ս…»:

Խօսքին հետ զուգահեռ սրահին մէջ մարմին ստացան հայազգի անմահ հերոսներ՝ Անդրանիկ, Գէորգ Չաւուշ, Սերոբ Աղբիւր, Սօսէ Մայրիկ մինչեւ Արեւմտեան Հայաստան ու ներկայիս Սփիւռքն ու «Զարմանալի Հայ»ը… խօսքն ու երաժշտութիւնը, հայ աշակերտի հարազատ հմտութեամբ ու զգայուն ապրումներով հասաւ իւրաքանչիւր ունկընդրողի հոգիին խորը… Ապրեցանք հպարտութիւնը հայ վարժարանին ու մանկավարժին ու անոնց հնազանդող պարման-պարմանուհիներուն:

Հանդիսութեան աւարտին, Խնամակալ Մարմնի մօտ Շրջանային Վարչութեան ներկայացուցիչ՝ Կարինէ Բարիկեան-Սէթեան խօսք առնելով, բարձր գնահատեց գործող ուսուցիչներու դերն ու պատասխանատուութիւնը ըսելով. «Խոնարհւում եմ ձեր առաջ յարգելի մանկավարժներ, ձեր բեռը ծանր է ներկայ սերունդի Հայեցի դաստիարակութեան գործընթացում, յատկապէս այս օտար ափերում. սակայն մենք վստահում ենք ձեզ յառաջ տանելու այս նուիրական աշխատանքը»:

Յայտագրի աւարտին յիշատակի խմբանկարով եւ հիւրասիրութեամբ ու խանդավառ տրամադրութեամբ ներկաները հեռացան սրահէն՝ գոհացած իրենց կատարողութեամբ եւ ոմանք իրենց ներկայութեամբ:

Ապրի՛ն ՀՕՄի Շաբաթօրեայ վարժարաններու ժրաջան ու հաւատաւոր աշակերտներն ու զանոնք մշակող դաստիարակները:

Ապրի՛ Հայ Օգնութեան Միութիւնը իր Սրբազան Առաքելութեամբ:

***

ՀՕՄի ԱՄՆի Արեւմտեան շրջանը հիմնուած է 1984ին, իր կեդրոնատեղին ունենալով Քալիֆորնիոյ նահանգի Կլէնտէյլ քաղաքին մէջ: Ան 26 մասնաճիւղերով մարդասիրական կազմակերպութիւն մըն է, չորս նահանգներու մէջ գործող աւելի քան 1,200 անդամներով: Շրջանի ՀՕՄը ունի Ընկերային Ծառայութեան բաժանմունքը, հոգեբանական կեդրոնը եւ կը հովանաւորէ զանազան պատանեկան-երիտասարդական ծրագիրներ, կրթանպաստներ եւ այլ նպաստներ: Մանրամասնութիւններու համար հաճեցէք այցելել ՀՕՄի www.arswestusa.org կայքէջը կամ հեռաձայնեցէք (818) 500-1343 թիւին:

Photos

Post a comment