Blog

ARS Sepan Chapter Saturday School’s Year End Program (in Armenian)

ՀՕՄի «Սիփան» Շաբաթօրեայի Ամավերջի Հանդէսը

ՀՕՄի «Սիփան» Շաբաթօրեայ վարժարանի ամավերջի հանդէսը տեղի ունեցաւ Շաբաթ, Յունիս 14ի առաւօտեան, Կլենտէյլի «Գրիգոր Եւ Մարիամ Գարամանուկեան» երիտասարդական կեդրոնին մէջ, ներկայութեամբ բազմաթիւ ծնողներու:

Ուսուցչական կազմը պատրաստած էր հակիրճ յայտագիր մը, որուն բացման խօսքը կատարեց տնօրէնուհին՝ Ալին Պզտիկեան-Շիրաճեան: Ան բեմ հրաւիրեց ամբողջ ուսուցչական կազմը, ծնողական յանձնախումբի ատենապետուհին եւ «Սիփան» մասնաճիւղի վարչական ընկերուհիները: Տնօրէնուհին իր շնորհակալութիւնը յայտնեց անոնց՝ նուիրելով մէկական վարդեր, առ ի գնահատանք: Ան նաեւ ուղղեց գնահատանքի խօսքեր բոլոր ծնողներուն՝ ըսելով. «Շնորհակալ ենք, որ ճիգ չի խնայեցիք հայապահպանման մեր պայքարին մէջ, ամէն շաբաթ ձեր զաւակները բերելով Շաբաթօրեայ վարժարան»։

Աշակերտները, թիւով 72, իրենց սորված երգերով եւ ասմունքներով հպարտացուցին բոլոր ներկաները: Այդ օր լսուեցան Սիլվա Կապուտիկեանի եւ Յովհաննէս Շիրազի խօսքերը, երգուեցան «Կագաւիկ»ը, «Ծնկըլ-Մընկըլ»ը, «Հայորդիք»ը եւ հրաժեշտի այլ երգեր:

Յայտագիրի աւարտին, «Սիփան» մասնաճիւղի ատենապետուհի Քրիսթին Յովնանեան իր սրտի խօսքով եւ ծաղկեփունջերով գնահատեց ուսուցչական կազմը: Խօսք առաւ նաեւ ՀՕՄի Շրջանային վարչութեան ատենապետուհի Լենա Պօզոյեանը, որ դարձեալ գերգնահատեց ծնողներու զոհաբերութիւնը եւ ուսուցչական կազմի անսակարկ նուիրումը:

Ապա աշակերտները ստացան իրենց վիճակացոյցները եւ տեղի ունեցաւ ճոխ հիւրասիրութին:

Ա. ՊԶՏԻԿԵԱՆ

Post a comment