Blog

Red Top Հաստատութեան Բարեգործութիւնը՝ Ի Նպաստ Հայ Օգնութեան Միութեան

Eat and Feed – Կեր oւ Կերակրէ։ Այս կարգախօսով է, որ այս տարի Red Top Supermarket & Kitchen  վաճառատունը, Դեկտեմբերի առաջին երեք Կիրակի օրերուն, ճաշի վաճառք մը կազմակերպած է եւ եկամուտը կը տրամադրէ Հայ Օգնութեան Միութեան «Սրտէ Սիրտ» հիմնադրամին։

Առաջին Կիրակին, 6 Դեկտեմբերն էր, որ մեծ ոգեւորութեամբ եւ արդիւնաւէտ ընթացաւ։ Շրջանէն բազմաթիւ բնակիչներ եւ ՀՕՄի անդամներ, իրենց ընտանիքներով այցելեցին  Glenoaks եւ Providencia  փողոցներու խաչմերուկին գտնուող  (600 S Glenoaks Blvd, Burbank, CA 91502) այս հաստատութիւնը , իրենց նուիրատուութեամբ եւ ճաշով օգտակար հանդիսացան բարեգործական այս նախաձեռնութեան։

«Մենք կը հաւատանք ՀՕՄի նուիրեալ գործունէութեան եւ այս փոքրիկ ժեստով մեր զօրակցութիւնը կը յայտնենք անոր բարեգործական աշխատանքին եւ կը գնահատենք Red Top հաստատութեան նուիրական այս գործը», ըսաւ այցելու մը, ախորժակով ճաշակելով հրամցուած համադամ հայկական քէպապը։

Իսկ աշխատանքներուն օգտակար հանդիսանալու եւ իր երախտագիտութիւնը յայտնելու համար Red Top վաճառատուն փութացած ՀՕՄի Շրջանային Վարչութեան ատենապետուհի Ռեպեքա Պէրպէրեան, բարձր գնահատելով Eat and Feed ծրագրի կազմակերպիչներ Ալպեռ եւ Արթիւր Կիրակոսեանները, գոհունակութեամբ ընդգծեց, ըսելով՝ «Երեք տարիներէ ի վեր, նման նախաձեռնութիւն մը սկսած է Red Top հաստատութիւնը, յատկապէս ամանորեայ տօնական օրերուն, բարեգործական կազմակերպութիւններու միջոցաւ,  կը թեթեւցնէ բեռը այն կազմակերպութիւններուն, որոնք օգտակար կը հանդիսանան կարիքաւոր եւ անօթեւան  ընտանիքներու։ Ուրախ ենք, որ այս տարի Red Top Հաստատութեան տնօրէնութիւնը այս տարի ընտրած է ՀՕՄը, որուն համար շնորհակալ ենք»։

Մարդասիրական այս աշխատանքը պիտի շարունակուի Կիրակի 13 եւ 20 Դեկտեմբերին եւս։  «Ժողովուրդիս հետ, ժողովուրդիս համար» իմաստալից նշանաբանի հաւատքով կը քաջալերենք հանրութիւնը եւ ՀՕՄի անդամները, որպէսզի այս զոյգ օրերուն անպայման  այցելեն Red Top Supermarket & Kitchen  վաճառատունը, ճաշակեն համադամ ճաշը եւ օգտակար հանդիսանալով ՀՕՄին։ Այսպիսով ՀՕՄը եւս, իր հերթին կարելիութիւնը կ՚ունենայ օժանդակելու կարիքաւորին եւ ժպիտ բերելու բոլոր անոնց դէմքերուն, որոնք օգնութեան կարիքը ունին։

* * *

ՀՕՄի ԱՄՆի Արեւմտեան շրջանը հիմնուած է 1984ին, իր կեդրոնատեղին ունենալով Քալիֆորնիոյ նահանգի Կլէնտէյլ քաղաքին մէջ: Ան 26 մասնաճիւղերով մարդասիրական կազմակերպութիւն մըն է, չորս նահանգներու մէջ գործող աւելի քան 1,200 անդամներով: Շրջանի ՀՕՄը ունի Ընկերային Ծառայութեան բաժանմունքը, հոգեբանական կեդրոնը եւ կը հովանաւորէ զանազան պատանեկան-երիտասարդական ծրագիրներ, կրթանպաստներ եւ այլ նպաստներ: Մանրամասնութիւններու համար հաճեցէք այցելել ՀՕՄի www.arswestusa.org կայքէջը կամ հեռաձայնեցէք (818) 500-1343 թիւին:

Post a comment