Blog

Reopening of the ARS Sepan Chapter Saturday School (In Armenian)

9ՀՕՄի «Սիփան» Շաբաթօրեայ Վարժարանի Վերամուտը

«Մենք մանուկներ հայոց ազգի… կ՛երթանք դպրոց շարան-շարան» դպրոցական քայլերգը լսուեցաւ Սեպտեմբեր 6ի առաւօտեան ժամը 10ին, երբ Կլենտէյլի ՀՕՄի «Սիփան» մասնաճիւղի հին ու նոր սաները իրենց ծնողներով ժամանեցին Շաբաթօրեայ վարժարանը՝ երեք ամիս ամառնային արձակուրդ մը անցընելէ ետք:

Անոնց դիմաւորեցին իրենց ուսուցիչ եւ ուսոցչուհիները, ՀՕՄի «Սիփան» վարչութեան ատենապետուհին՝ իր վարչական անդամներով, եւ ՀՕՄի Շաբաթօրեայ վարժարաններու խնամակալ մարմինի ներկայացուցիչներ:

Իր բարի գալուստի խօսքէն ետք, տնօրէնուհի Ալին Պզտիկեան-Շիրաճեան հրաւիրեց Ս. Աստուածածին Հայց. առաք. եկեղեցւոյ հոգեւոր հովիւ Արտակ քհնյ. Տէմիրճեանը, որ աշակերտութեան տայ իր պատգամն ու օրհնութիւնը:

Խօսք առաւ նաեւ վարչութեան ատենապետուհին՝ Միկանուշ Մելքոնեանը, որ ընդգծեց շաբաթօրեայ վարժարաններուն խաղացած կարեւոր դերը եւ անոնց ունեցած դրական ազդեցութիւնը: Ատենապետուհին օրինակ բերաւ վարժարանի աշակերտներէն Սարգիս Օւայեանը, որուն հայերէն լեզուի իմացութիւնը ցայտուն երեւոյթ էր իր ամէնօրեայ դպրոցէն ներս: Իսկ խնամակալ մարմինի ներկայացուցիչ եւ վարչութեան անդամ Սոնա Գիզիրեան փոխանցեց իր սրտագին մաղթանքները նոր տարեշրջանին համար:

Վարժարանէն ներս, տնօրէնուհիին կողքին կը գործեն ուսուցչուհիներ Անի Չօլոյեան, Մարիա Ղարիպեան, Մհեր Միհրանեան եւ Լուսինէ Մելիքսէթեան:

Դասաւանդութիւնները տեղի կ՛ունենան ամէն Շաբաթ ժամը 10էն 1: Աւելի քան 70 աշակերտներու կը դասաւանդուի հայերէն լեզու, պատմութիւն, հայկական երաժշտութիւն եւ հայկական պար: Աշակերտները մասնակից կ՛ըլլան միջ-վարժարանային հայոց պատմութեան տարեկան զարգացման մրցումին եւ Ապրիլեան ոգեկոչումներու, նաեւ կ՛ունենան իրենց տարեկան հանդէսները։

Վարժարանը կ՛ընդունի 4 տարեկանէն սկսեալ երեխաներ: Արձանագրութեան եւ յաւելեալ մանրամասնութիւններու համար, կարելի է դիմել հետեւեալ թիւին՝ 818-261-8647:

Խմբավար Լուսինէ Մելիքսէթեան մաս կը կազմէ ՀՕՄի «Սիփան» մասնաճիւղի Շաբաթօրեայի ուսուցչական կազմին։ «Լուսինէ Մելիքսէթեան աստղ մըն է հայ երաժշտութեան մէջ եւ մենք բախտաւորուած կը զգանք իրմով», կ՛ըսէ ՀՕՄի «Սիփան» մասնաճիւղի Շաբաթօրեայ վարժարանի տնօրէնուհի Ալին Պզտիկէան-Շիրաճեան:

Լ. Մելիքսէթեան այս տարի միացաւ վարժարանի ուսուցչական անձնակազմին, որպէս հայ երաժշտութեան դասատու եւ խմբավար: Ան ուսած է Ռոմանոս Մելիքեանի անուան երաժշտական ուսումնարանի դաշնամուրի բաժինը, ուր տարած է նաեւ մանկավարժական աշխատանք: Աշխատած է Չայքովսքիի անուան դպրոցը՝ որպէս ուսուցչուհի եւ երգչախումբի ղեկավար, ապա «Գոհար» երգչախումին հետ որպէս խմբավար, ինչպէս նաեւ «Հայ փոքրիկ երգիչներ» ընկերակցութեան հետ:

Միացեալ Նահանգներ տեղափոխուելէ ետք եւ մինչեւ այսօր, ան կ՛աշխատի International School of Music երաժշտական դպրոցին մէջ, որուն տնօրէնն ու սեփականատէրն է Սարօ Մանկասարեանը:

Post a comment